Меҳнат муҳожирлари Саудиядан кетиб қоляпти
Расмий статистикага кўра, уч ой ичида 250 мингдан ортиқ хорижлик меҳнат муҳожирлари Саудия Арабистонини тарк этган. Бунга эса коронавирус пандемияси сабаб бўлган.
The New Arab нашрининг хабар беришича, ўтган йилнинг иккинчи чорагида Саудия Арабистонида 10 459 032 нафар хорижлик меҳнат муҳожири бор эди. Кейинги чоракда уларнинг сони 10 201 862 нафарга тушган.
Коронавирус пандемияси даврида саудиялик тадбиркорларнинг 2,4 фоизи даромад йўқлиги туфайли корхоналарини ёпишга мажбур бўлган.
Саудия Арабистонида коронавирусга чалинганлар сони 366 мингдан, ушбу инфекция туфайли вафот этганлар сони эса 6 300 нафардан ошди. Мамлакатда коронавирусга қарши уч босқичли эмлаш дастури бошланган. Аввалига инфекция юқиш эҳтимоли юқори бўлганлар, 65 ёшдан катталар ва сурункали касалликка чалинганлар эмланади.
