МАГАТЭ йил охиригача Запорожье АЭС атрофида демилитаризация зонасини яратишга умид қилмоқда
Бу ҳақда Атом энергияси бўйича халқаро агентлик бош директори Рафаел Гросси маълум қилди.
"Менинг вазифам имкон қадар тезроқ ечим топишдир. Умид қиламанки, йил охиригача бу масалада ечим топилади", — деди Гросси Италиянинг La Repubblica газетасига берган интервюсида. “Мен Путин жараённи кузатиб бораётганини биламан, яқин келажакда у ва Украина президенти Зеленский билан яна бир учрашув ўтказишни истисно этмайман”, — дея қўшимча қилди у.
Гросси бир неча бор ўққа тутилган ЗАЭС атрофида демилитаризация зонасини яратишга ҳаракат қилмоқда. Унинг сўзларига кўра, урушаётган иккала томон ҳам АЭС ҳудудини ўққа тутмаслик ва унинг ҳудудидан ўт очмаслик ҳақида принципиал келишиб олган.
"Россия келишувга ва заводни ҳимоя қилиш тамойилига қарши эмас. Украиналиклар талаб қилаётган нарса эса заводдан қурол-яроғнинг олиб чиқиб кетилишига эришиш ҳисобланади. Ва ҳар ҳолда, бу умумий келишувнинг бир қисми бўлади", — дея қўшимча қилди МАГАТЭ раҳбари.
