Колонияда сақланаётган мухолифатчи Алексей Навальнийнинг аҳволи ёмонлашаётгани хабар берилди

Россиянинг Покров шаҳридаги 2-сонли ахлоқ тузатиш колонияси шифокорлари мухолифатчи Алексей Навальнийга МРТ (магнит-резонанс томография) орқали унда иккита умуртқа чурраси аниқланганини маълум қилди. Бу ҳақда «Дожд» телеканалига сиёсатчининг адвокати Ольга Михайлова хабар берган, деб ёзади «Korrespondent.net».

«Алексейга МРТ натижасини ҳам, тиббий хулосани ҳам кўрсатишмаган, аммо унга қўйилган ташхисни оғзаки маълум қилишган», — дея аниқлик киритди адвокат.

Унинг сўзларига кўра, Навальнийга колонияда ёзиб берилган муолажа «самарасиз ва унинг аҳволи ёмонлашишига олиб келиши мумкин». Ахлоқ тузатиш муассасаси тиббий ходимлари бемор диклофенак ва никотин кислотасини қабул қилиши кераклигини таъкидламоқда. Унинг фикрича, маъмурият мухолифатчининг бошқа жойдан таклиф қилинган шифокорлар томонидан кўрикдан ўтказилишидан қўрқади, чунки «уларнинг жуда ёмон муолажалари Навальнийнинг соғлиғи ёмонлашишига олиб келгани ошкор бўлиб қолиши мумкин».

Михайлованинг айтиб беришича, сиёсатчининг ҳамон бели ва оёғи оғрияпти. «Устига устак, унинг ҳис қилиш қобилияти йўқоляпти, оёғидан ташқари, энди қўллари ҳам шундай бўляпти», — деди адвокат. Шунингдек, унинг айтишича, 5 ва 6 апрель кунлари мухолифатчининг ҳарорати кўтарилган.

Эслатиб ўтамиз, Алексей Навальний колонияда унга бошқа жойдан шифокор чақиришни талаб қилиб, 31 мартдан буён очлик эълон қилиб келмоқда. Жазоларни ижро этиш федерал хизмати зарур ёрдам кўрсатилаётганини таъкидламоқда.

Айни пайтда, Москва шаҳар суди Навальнийнинг Коррупцияга қарши кураш фонди ҳуқуқшуноси Любовь Соболь, муниципал депутатлар Люся Штейн ва Константин Янкаускас, шунингдек, Алексей Навальнийнинг укаси Олег Навальнийни уй қамоғидан озод этди. Уларга нисбатан олдини олиш чораси муайян ҳаракатларни тақиқланишига ўзгартирилди. Тақиқ 23 июнгача амал қилади. Улар ўзаро мулоқот қилмаслиги, кечаси уйда бўлиши керак, шунингдек, почта ва телеграф орқали жўнатмаларни амалга оширолмайди.

«Санитар иш» доирасида жами 12 киши қўлга олинган ва уй қамоғига ҳукм қилинган эди. Улар айблов версиясига кўра, 2021 йил қишида Алексей Навальнийни қўллаб-қувватлаб акцияда қатнашишга даъват қилган ва шу тариқа, коронавирусга қарши чекловлар шароитида одамларни санитар-эпидемиологик меъёрларни бузишга ундаган.