Жиззахга "кўчган анъана": Яна ўқувчилар совуқ кунда усти юпун ҳолда тадбирга олиб чиқилди
Ижтимоий тармоқларда шундай совуқ кунларда усти юпун ҳолда ташқарида тадбирда иштирок этаётган яна бир мактаб ўқувчиларининг сурати тарқалди. Суратлар Бахмал туманига тегишли экани айтилди.
Туман ҳокимлиги Ахборот хизмати хабарига кўра, Жиззах вилоятининг Бахмал туманида 20 ноябрь куни ахборот-кутубхона маркази очилиши бўлиб ўтган.
"Очилиш маросимига ташриф буюрганлар Ахборот кутубхона марказида турли тиллардаги энг сара асарлар китобхонлар учун тақдим қилинганлиги ва марказда йўлга қўйилган хизматлар билан яқиндан танишишди. Ахборот-кутубхона маркази жорий йил давомида 1602 номдаги 10427 нусхада бадиий адабиётлар ва дарсликлар билан бойитилди. Жами кутубхона фонди бугунги кунда 1602 номда 10427 нусхада бўлиб, шундан лотин алифбосида 6404та, крилл алифбосида 3873 та, рус тилида 75 та, инглиз тилида 75 тани ташкил этади", дейилади тадбир юзасидан берилган хабарда.
Ана шу тадбирда ўқувчилар расмда кўриниб тургани каби атрофда қорлар ҳали эримаган, кун совуқ бўлган бир пайтда енгил кийимларда очиқ ҳавода тадбирда иштирок этишган. Ижтимоий тармоқ фойдаланувчилари томонидан болаларнинг усти юпунлиги, бироқ атрофдаги "катталар"нинг эса, аксинча, қалин кийимларда экани танқид қилинган.
