Истисқо намози қандай ўқилади?

Бу йил куз фасли ёғингарчиликсиз ўтаётгани, яқин кунларда ҳам ёмғир кутилмаётгани эътиборидан республикамизнинг барча масжидларида истисқо намозини ўқиш мақсадга мувофиқ, деб топилди.

Истисқо намозини адо этиш учун катта жамоат бўлиши эътиборидан истисқо намозини жума намози вақтида адо этиш айни муддаодир. Зеро, ривоятларда пайғамбаримиз алайҳиссалом ҳам жума намози вақтида истисқо дуосини ўқиганлари келтирилади.

Фиқҳий китобларимизда истисқо намозидан олдин унга руҳан тайёргарлик кўрилиши баён этилган. Жумладан, ўтган гуноҳларни ёдга олиб, унга тавба қилиш, истиғфор калимасини кўп айтиш, ўзгаларнинг ҳақини адо этиш, қарзларни узиш, ўзаро аразлашганлар бўлса ўртани ислоҳ қилиб, бир-бирларидан розилик олишлари, моддий имкониятга эга кишилар камбағал ва муҳтожларга садақа ва эҳсон тарқатишлари тавсия этилади.

Демак, эртага ўқиладиган истисқо намози жума намозининг фарзи ва ундан кейинги тўрт ракатли суннатини адо этиб бўлгандан кейин ўқилади. Намоз бошланиши олдидан муаззин жамоатни сафланишга чорлаши билан саф тортилади. Намозга ният қилишда: “Икки ракатли истисқо намози ўқишни ният қилдим, ҳозир бўлган имомга иқтидо қилдим”, дейилади. Истисқо намози икки ракат, худди жума намозидек адо этилади. Намоздан кейин имом қавмга юзланган ҳолда тик туриб қисқача хутба қилади. Хутбадан кейин қиблага юзланиб тик турган ҳолда дуо қилади. Жамоат эса, ўтирган ҳолида имомнинг дуосига “омин” деб туради.

Имом ҳар гал “Аллоҳумма” деб дуо қилганида, жамоат “Омин”, деб туриши айни муддаодир. Чунки, “омин” калимаси “ижобат қил”, “қабул қил”, “шундай бўлсин”, деган маънони англатади.

Истисқо дуоси

اللَّهُمَّ أَغِثِ الْقُلُوبَ بِالْإِيمَانِ، وَالْأَرْضَ بِالْمَطَرِ وَالْهَتَّانِ، اللَّهُمَّ أَنْتَ اللهُ لَا إِلَهَ إِلَّا أَنْتَ، أَنْتَ الْغَنِيُّ وَنَحْنُ الْفُقَرَاءُ، أَنْزِلْ عَلَيْنَا الْغَيْثَ وَلَا تَجْعَلْنَا مِنَ الْقَانِطِينَ، اللَّهُمَّ اسْقِنَا وَأَغِثْنَا، اللَّهُمَّ أَغِثْنَا، اللَّهُمَّ أَغِثْنَا، اللَّهُمَّ أَغِثْنَا، غَيْثًا مُغِيثًا، هَنِيئًا مَرِيئًا، مُجَلِّلًا سَحًّا، عَامًّا دَائِمًا، نَافِعًا غَيْرَ ضَارٍّ، عَاجِلًا غَيْرَ آجِلٍ، اللَّهُمَّ تُحْيِي بِهِ الْبِلَادَ، وَتُغيثُ بِهِ الْعِبَادَ، وَتَجْعَلُهُ رَحْمَةً لِلْحَاضِرِ وَالْبَادِ، اللَّهُمَّ سُقْيَا رَحْمَةٍ لَا سُقْيَا عَذَابٍ وَلَا هَدَمٍ وَلَا بَلَاءٍ وَلَا غَرْقٍ، اللَّهُمَّ أَنْبِتْ لَنَا الزَّرْعَ، وَأَدِرَّ لَنَا الضَّرْعَ، وَأَنْزِلْ عَلَيْنَا مِنْ بَرَكَاتِكَ، وَاجْعَلْ مَا أَنْزَلْتَهُ قُوَّةً لَنَا عَلَى طَاعَتِكَ، وَبَلَاغًا إِلَى حِينٍ.

اللَّهُمَّ إِنَّا خَلْقٌ مِنْ خَلْقِكَ، فَلَا تَمْنَعْ عَنَّا بِذُنُوبِنَا فَضْلَكَ }رَبَّنَا لَا تُؤَاخِذۡنَآ إِن نَّسِينَآ أَوۡ أَخۡطَأۡنَاۚ رَبَّنَا وَلَا تَحۡمِلۡ عَلَيۡنَآ إِصۡرٗا كَمَا حَمَلۡتَهُۥ عَلَى ٱلَّذِينَ مِن قَبۡلِنَاۚ رَبَّنَا وَلَا تُحَمِّلۡنَا مَا لَا طَاقَةَ لَنَا بِهِۦۖ وَٱعۡفُ عَنَّا وَٱغۡفِرۡ لَنَا وَٱرۡحَمۡنَآۚ أَنتَ مَوۡلَىٰنَا فَٱنصُرۡنَا عَلَى ٱلۡقَوۡمِ ٱلۡكَٰفِرِينَ{ بِرَحْمَتِكَ يَا أَرْحَمَ الرَّاحِمِينَ

Маъноси:

“Ё Аллоҳ, бизга фойдали, сероб, равон, баракотли, зиёда ва кўп ёмғир ёғдиргин! Кечикмаган ҳолда, тезда ёғсин. Зарарсиз ва фойдали бўлсин!”
“Ё Аллоҳ! Қалбларни иймон билан, ерни эса ёмғир ва майин томчилар билан сероб қил.
Ё Аллоҳ! Сен Ўзинг Аллоҳсан, Сендан ўзга илоҳ йўқ. Сен Бой Зотсан (беҳожатсан), биз эса камбағал (муҳтож) бандалармиз. Бизга қут-баракали ёмғир ёғдиргин ва бизни ноумид бўлувчилардан қилиб қўймагин.
Ё Аллоҳ! Бизни сероб қил ва ёрдам бер! Ё Аллоҳ! Ёрдам бер! Ё Аллоҳ! Ёрдам бер! Ё Аллоҳ! Ёрдам бер! Ёғиши билан мадад берувчи, ош бўлувчи, ёқимли, давомли, кенг қамровли, доимий, фойдали, зарарсиз, кечиктирилмасдан тезроқ бўлган ёмғир билан ёрдам бер!
Ё Аллоҳ! Сен у ёмғир билан юртларни тирилтирасан, бандаларни нажот бериб сероб қиласан, ва уни ҳозирга ва келажакка (шаҳарда ва чўлда яшовчиларга) раҳмат қилиб қўясан. Ё Аллоҳ! Бу раҳмат ёмғири бўлсин, азоб, вайронагарчилик, бало ва ғарқ қилиш ёмғири бўлмасин!
Ё Аллоҳ! Биз учун экинларни ундириб, сутли ҳайвонларнинг сутидан барака бериб, Ўз баракотларингни бизга нозил қил. Ва Сен нозил қилган нарсани биз учун Сенинг тоатингга (ибодатимизга) қувват ва белгиланган вақтгача (яшашимизга) етказгувчи восита қилгин.
Ё Аллоҳ! Биз Сенинг яратган жонзотларингнинг бир қисмимиз. Шундай экан, гуноҳларимиз туфайли Ўз фазлингни биздан ман қилиб қўймагин.
Эй Раббимиз! Агар унутсак ёки хато қилсак, бизни жазоламагин.
Эй Раббимиз! Биздан олдингиларга юклаган оғир юкни бизга юкламагин.
Эй Раббимиз! Тоқатимиз етмайдиган нарсани зиммамизга олмагин. Ва бизни афв эт, мағфират қил ва раҳм айла. Сен бизнинг Хожамизсан. Бас, Ўз раҳматинг билан, эй Раҳмлиларнинг Раҳмлиси!”.
***

Истисқо дуосидан кейин доимгидек Қуръон тиловат қилиниб, жамоат ва бошқа дуо сўраганлар ҳақига дуо қилинади.

✅ Ўзбекистон мусулмонлари идораси Матбуот хизмати