Испания сайёҳларни қабул қилишни бошлади. Фақат...
Испания 7 июндан бошлаб COVID-19'га қарши тўлиқ эмланган сайёҳлар учун ўз чегараларини очди. RTVE’нинг таъкидлашича, Pfizer, Moderna, AstraZeneca ва Janssen томонидан ишлаб чиқарилган, Европа дори-дармон агентлиги томонидан тасдиқланган вакциналар билан бирга, Хитойнинг Sinopharm ва Sinovac-Coronavac препаратлари билан эмланган сайёҳлар ҳам Испанияга ташриф буюришлари мумкин.бу ҳақда RTVE хабар берди.
Испанияга ташриф буюришни истаган сайёҳ аввало мамлакатга киришдан камида 14 кун олдин тўлиқ эмлаш циклини ўтганини тасдиқлаши керак. Бунинг учун QR кодини ишлаб чиқарадиган махсус дастур орқали интернетда сўровнома тўлдирилади. Ушбу ҳужжат мамлакатга кетишдан олдин ҳам, паспорт назоратидан ўтаётганда ҳам тақдим этилиши керак.
Шунингдек, 7 июндан бошлаб Испания мамлакат портларида круиз кемаларини қабул қилишга рухсат берди. Шу билан бирга, Бразилия, Ҳиндистон ва Жанубий Aфрикадан келган сайёҳлар ушбу мамлакатлардаги оғир эпидемиологик вазият туфайли Испанияга кира олмайди.
