Ҳиндистон жанубидаги кўчкилар қурбонлари сони 358 кишига етди
Ҳиндистон жанубидаги Керала штатида кучли ёмғир оқибатида юзага келган кўчкилар қурбонлари сони 358 кишига етди, деб хабар бермоқда India Today.
Маҳаллий ҳокимият маълумотларига кўра, қидирув-қутқарув ишлари ҳамон давом этмоқда.
Йўқолганлар рўйхатида 200 дан ортиқ киши бор.
Ҳиндистон армияси вайроналар остида қолган одамларни қидириш учун минтақага радарлар юборди.
Расмийлар аввалроқ Керала тарихидаги энг даҳшатли табиий офатлардан бирига дуч келганини айтган эди.
Ҳиндистон армияси 1 август куни штатда 1500 нафар аскари борлигини айтди.
Штатдаги табиий офатдан жабр кўрган 8300 дан ортиқ киши лагерларга эвакуация қилинган.
30 июль куни кучли ёмғирлар натижасида Керала штатида кўчкилар содир бўлиб, инфратузилма ва йўлларга жиддий зарар етган. Жабрланган Чооралмала қишлоғида 200 та уй вайрон бўлган.
