Гитлер туғилган уй полиция бўлимига айлантирилади
Учинчи Рейх етакчиси Адольф Гитлер туғилган Браунау-ам-Инн шаҳридаги уйни қайта қуриш бўйича тендерда Австриянинг “Marte.Marte” архитектура бюроси ғолиб чиқди.
Бу ҳақда Австрия Ички ишлар вазирлигида ўтказилган матбуот анжуманида маълум қилинди.
Полиция бўлими сифатида ишни бошлайдиган бинони реконструкция қилиш 2022 йилга қадар якунланиши режалаштирилган бўлиб, лойиҳа 5 миллион еврога тушади.
«Бинонинг собиқ эгаси 812 минг эвро миқдорида товон пули олди. Ички ишлар вазирлиги уйни ҳуқуқ-тартибот идоралари эҳтиёжлари учун ишлатилиши бу бино ҳеч қачон Миллий сотсиализмни эслатмаслигини кўрсатиб беришини таъкидламоқда», дейилади хабарда.
Таъкидланишича, илгари ушбу уч қаватли бинода кутубхона, сўнг банк филиали ҳамда мактаб, 1977 йилдан кейин эса ногиронлар учун устахоналару бошпана бўлган.
