Германия кичик ва ўрта бизнес корхоналари федерал уюшмасининг йиллик конгрессида Ўзбекистон миллий стенди ташкил этилди

Берлин шаҳридаги "STATION" кўргазма марказида бўлиб ўтган Германия кичик ва ўрта бизнес корхоналари федерал уюшмаси (Bundesverband mittelständische Wirtschaft, BVMW)нинг йиллик конгрессида Ўзбекистон миллий стенди ташкил этилди, деб хабар бермоқда "Дунё" АА мухбири.

"Кичик ва ўрта бизнес келажак сари" мавзусидаги тадбирда беш мингдан ортиқ Германиянинг кичик ва ўрта бизнес ҳамда ишбилармон доиралари вакиллари, йирик сармоядорлар, шунингдек бир қатор вазирликлари раҳбарлари, сиёсий партиялар етакчилари ва 50 дан ортиқ давлат элчилари қатнашди.

Мамлакатимиз элчихонаси томонидан ташкил этилган миллий стендда ташриф буюрувчиларга Ўзбекистон иқтисодий-сармоявий ва туризм салоҳияти, республикамизда амалга оширилаётган кенг кўламли ислоҳотлар ҳақида атрофлича маълумот берилди. Мулоқот чоғида мамлакатимиз билан ҳамкорлик қилиш истагини билдирган салоҳиятли компаниялар билан кимё, қишлоқ хўжалиги маҳсулотлари, машинасозлик, ахборот технологиялари, туризм, касб-ҳунар таълими ва транспорт соҳаларида лойиҳаларни амалга ошириш бўйича музокаралар олиб борилди.

Компьютер технологиялари соҳасида етакчи саналган "AMD" компанияси мамлакатимиз билан процессорлар, микросхемалар ишлаб чиқариш борасида, "Edu-WorldWide" компанияси касбий ва дуал таълим соҳасида, Халқаро мутахассислар учун немис компетенция маркази (DKF) эса соғлиқни сақлаш ва ҳамшираларни ишга ёллаш соҳаларида ҳамкорликда лойиҳаларни амалга оширишга қизиқиш билдирди.

Таъкидлаш керакки, ГФРда кичик ва ўрта бизнес немис иқтисодиётининг асосини ташкил этади ва банд иш ўринларининг 70 фоизи унинг ҳиссасига тўғри келади. Германияда кичик ва ўрта бизнес корхоналари янги ғоялар генератори сифатида тан олинади. Инновациялар ва патентларнинг 75 фоизи уларнинг улушини ташкил қилади.

"GABEC" GmbH компанияси менежери Торстен Клаус:

— Германия кичик ва ўрта бизнес тадбиркорлари кунида Ўзбекистоннинг ҳам иштирок этаётганидан хурсандман. Компаниямиз ўрта бизнес субъекти саналади, айни пайтда Ўзбекистон томони билан ҳам бир қатор қўшма лойиҳаларни амалга оширяпмиз. Тошкентда компаниямизнинг ваколатхонаси бор. Биз ўзбекистонлик ва германиялик ўрта бизнес субъектларини ҳамкорликда ўз бизнесларини юритишга чорлаймиз, уларга ўз билим ва тажрибамиз билан кўмаклашамиз. Ўйлайманки, Германиянинг кичик ва ўрта бизнес тадбиркорлари яқин келажакда Ўзбекистон бозорида ўз ўрнини мустаҳкамлайди ва муваффақиятли бизнес юритишга эришади.

Германиялик компаниялар Ўзбекистонда тадбиркорлик фаолиятини амалга ошириша олишларига аминмиз. Чунки, Ўзбекистонда инноватив билимларга чанқоқ, ишлаш хоҳишида бўлган ёшлар кўпчиликни ташкил этади. Ҳар сафар Тошкентга борганимда одамларнинг биз билан ҳамкорлик қилишга тайёрлигини кўриб хурсанд бўламан. Айни пайтда биз Тошкентда логистика соҳасида фаолият юритяпмиз.

"AMD" компаниясининг маркетинг бўйича директори Кристиан Дотцауер:

— Компаниямиз компьютер технологиялари соҳасида етакчи саналади ва процессорлар, микросхемалар, график карталар ишлаб чиқаришга ихтисослашган. Ушбу кўргазмада иштирок этишимиздан мақсад компьютер технологиялари соҳасидаги кичик ва ўрта бизнес субъектлари билан учрашиш, улар билан алоқа ўрнатиш ва тажриба алмашишдир. Хабарингиз бор, бугунги кунда сунъий интеллектнинг аҳамияти ошиб бормоқда. Компаниялар яқин келажакда яна ҳам муваффақиятли бўлишлари, маҳсулдорликни ошириш ва ўз маҳсулотларини самарали сота олишлари учун сунъий интеллектнинг имкониятлари ва талабларини билиши лозим. Биз кичик ва ўрта бизнес вакиллари билан мулоқотда халқаро даражада муносабатлар ўрнатишга ҳам эришдик.

Бугунги тадбирдаги иштирокимиз бизга сунъий интеллектнинг хорижий давлатларда қўлланилиш тажрибаси, компанияларнинг бизга қўядиган талаблари, бозор эҳтиёжларини ўрганиш имкониятини берди.