Фуқароларни чет элга ишга юбормоқчи бўлган фирибгарга суд ҳукми ўқилди
Н.Ноибов (исми шарифи ўзгартирилган) алдаш ёки ишончни суиистеъмол қилиш йўли билан ўзганинг мулкини қўлга киритиш мақсадида терговда қисми алоҳида иш юритувга ажратилган шахс билан ўзаро жиноий тил бириктириб, бир гуруҳга бирлашиб, уюшган гуруҳ манфаатларини кўзлаб, 2019 йил январь ойида Саитов Сирож Самановичнинг ишончига кириб, унга “биз фуқароларни хорижга ишга қонуний йўллар билан юборяпмиз, тўловларни тўлиқ тўлаб берсангиз ўқиб ҳам ўтирмайсиз” деб алдаб, С.Саитовнинг ўғли К.Саитовни Германия давлатига юборишларига ишонтиришиб, С.Саитовдан жами 16.700.000 сўм миқдоридаги пулларни фирибгарлик йўли билан қўлга киритиб, К.Саитовни Германия давлатига юбориш учун бирор бир иш қилишмасдан, унга чет давлатларидан чақирув қоғози келганлиги тўғрисидаги сохта ҳужжатларни тақдим этганлар.
Н.Ноибов ўзининг жиноий фаолиятини давом эттириб, Б.Бакировни Польша давлатига юборишларига ишонтиришиб, Б.Бакировдан жами 10.000.000 сўм миқдоридаги пулларни олиб, ўзганинг анча миқдордаги мулкини фирибгарлик йўли билан қўлга киритганлар.
Н.Ноибов ўзининг жиноий фаолиятини давом эттириб, К.Кодировни 45.000.000 сўм пул берса, ушбу пуллар эвазига Япония давлатига юборишларига ишонтиришиб, К.Кодировдан 11.248.716 сўмга тенг бўлган 1.200 АҚШ доллар ҳамда 13.500.000 сўм, жами 24.748.716 сўм пулларни олиб, К.Кодировни Япония давлатига юбориш учун бирор бир иш қилмасдан, фирибгарлик йўл билан қўлга киритганлар.
Суд мажлисида Н.Ноибов айбига иқрорлик билдирмаган бўлсада, унинг айби жабрланувчилар ва гувоҳларнинг иш ҳолатини тасдиқлаб берган кўрсатувлари, жабрланувчиларнинг аризалари ҳамда судда текширилган бошқа далиллар билан исботланди.
Суд томонидан Н.Ноибовга Ўзбекистон Республикаси ЖК 168-моддаси 4-қисмининг “в” банди ва 228-моддаси 2-қисмининг “а,б” бандлари билан ЖКнинг 59-моддасига асосан 8 йил 3 ой озодликдан маҳрум қилиш жазоси тайинланди.
Мазкур жиноят иши Жиззах вилоят суди апелляция инстанциясида кўрилиб, Н.Ноибовга нисбатан чиқарилган ҳукм ўзгаришсиз қолдирилди.
Дилшод Эшматов,
Жиззах вилоят судининг судьяси
