Фаластиннинг икки йирик сиёсий кучи биргаликда ҳаракат қиладиган бўлди
Келгуси олти ой ичида Иордан дарёсининг ғарбий соҳилида ва Ғазо секторида парламент сайлови бўлиб ўтади.
ФАТХ етакчиси Маҳмуд Аббос ва ХАМАС ҳаракати сиёсий бюроси раҳбари Исмоил Хания ана шунга келишиб олишди, дея хабар бермоқда "IslamToday"га таяниб "azon.uz".
Фаластиннинг икки асосий кучи етакчилари бирлашган миллий раҳбарият тузиш ва Фаластин озодлик ташкилотининг ролини фаоллаштиришнинг муҳимлигини таъкидлашган. Одатда ўзаро рақобат қилувчи бу сиёсий кучларнинг яқинлашиши 15 сентябрь куни Бирлашган Араб Амирликлари ва Баҳрайннинг Исроил билан алоқа ўрнатиш бўйича битим тузиши ортидан юз берди.
Фалатин қонунчилик кенгаши учун сайлов охирги марта 2006 йилнинг январида бўлиб ўтган. Аслида сайлов ҳар тўрт йилда ўтказилиши керак, бироқ Исроил қамали туфайли ўтказишнинг иложи бўлмади.
2007 йилда ФАТҲ ва ХАМАС ўртасида низо юз берган, оқибатда Рамаллоҳ ва Ғазо ўртасида парокандалик келиб чиққан эди.
