Европа Иттифоқининг Россиядаги элчиси Литванинг Калининградга юк транзитини тақиқлагани сабабли Россия ТИВга чақирилди

Европа Иттифоқининг Россиядаги элчиси Маркус Эдерер Литва юкнинг бир қисмини ўз ҳудуди орқали Калининград вилоятига олиб ўтишни тақиқлагани муносабати билан Россия ТИВга чақирилди. Бу ҳақда вилоят губернатори Антон Алихонов телевидениега берган интервьюсида маълум қилди.

"Менга маълум бўлишича, эртага [сешанба куни] Европа Иттифоқининг Россиядаги элчиси Маркус Эдерер ТИВга Смоленкага чақирилган ва унга тегишли шартлар қўйилади", — деди Алихонов.

18 июндан бошлаб Вильнюс Европа Иттифоқининг Россияга нисбатан қўйган санкцияларига мувофиқ, Литва ҳудуди орқали Калининград вилоятига ва ундан олиб ўтиладиган юк транзитини тақиқлади.

Тақиқ материк Россия ва Калининград ўртасида ташиладиган барча темир йўл юкларининг 50% гача, шу жумладан қурилиш материаллари, бетон ва металларга таъсир қилади.

Алихоновнинг сўзларига кўра, Россия блокада билан боғлиқ ҳолда жавоб чораларини кўради.

Вильнюс расмийлари Москванинг огоҳлантиришларини асосан шов-шув сифатида қабул қилишди, деб ёзади New York Times.

Литва парламентининг миллий хавфсизлик ва мудофаа бўйича қўмитаси раиси Лауринас Кащюнас, "Россия таҳдидлари бизни ташвишга солаётгани йўқ, Кремлнинг жавоб бериш имкониятлари жуда кам", деб изоҳ берди.

Унинг фикрича, Литва НАТО аъзоси бўлгани учун Россиядан ҳарбий жавоб бўлиши даргумон. Агар шундай бўлмаганида, Москва бундай имкониятни кўриб чиқса керак, деб ҳисоблайди Кащюнас.
"Россиянинг Украинадаги ҳарбий ҳаракатлари муносабати билан Европа Иттифоқи томонидан киритилган санкциялар Россия таркибига кирувчи, аммо мамлакатнинг қолган қисми билан боғланмаган минтақанинг кескин заифлигини очиб берди", деб ёзади New York Times. У Болтиқ денгизи билан чегарадош, аммо НАТОга аъзо икки давлат — Литва ва Польша ўртасида жойлашган.

Ҳозирча Россия Ташқи ишлар вазирлиги элчининг чақирувини расмий тасдиқлаганича йўқ.