Чироқчилик ИИБ ходимлари қотилликни яшириш учун гувоҳларнинг оғзини ёпишга уринганми?

Чироқчи туманида ўғриликда гумонланган 32 ёшли фуқарони уриб ўлдирган ИИБ ходимлари ўз қилмишини яширишга ҳам уринган. Бу ҳақда марҳум Ю.А. билан бирга калтакланган ота-бола — Қурбон Остоноев ҳамда Баҳром Авлиёқуловлар маълум қилди, дея хабар берди «Дарё» мухбири.

Фото: «Дарё»

«Дарё» мухбири Отабек Қўлдошев калтакланиш оқибатида вафот этган марҳумнинг яқинлари ҳамда ўша куни воқеа жойида бўлган ота-бола билан билан суҳбатлашиш учун Чироқчи туманида бўлди.

Баҳром Авлиёқулов
Фото: «Дарё»

— Прокуратура воқеани сўраб-суриштиришни бошлагач, бизни калтаклаган ИИБ ходимларидан бири отамга «‘участкавой’ларингни қутқариб қолсаларинг, ургани йўқ, деб юборсаларинг, рози қилади» деди, — дейди Баҳром Авлиёқулов.

Айни пайтда туман шифохонасида даволанаётган ота-боланинг айтишича, туман ИИБ биносида вафот этган марҳум Ю.А. калтакланаётган пайт улар ҳам ўша ерда бўлган. Улар ҳам ИИБ ходимлари томонидан аёвсиз калтакланган.

Қурбон Остоноевнинг айтишича, у 21 январь куни кечки пайт қишлоқ профилактика инспектори томонидан туман ИИБга олиб борилган.

Қурбон Остоноев
Фото: «Дарё»

— «Участкавой» мени ИИБга олиб боргач, Нурбек исмли ходимга топширди, — дейди Қурбон Остоноев. — Ходим мени кўриши билан ҳақорат қила бошлади. Тилга олиб бўлмас сўзлар билан сўкди. Аввал олд томонимга, кейин орқамга икки марта тепди, муштлаб урди. «Марҳум Ю.А.дан мол сотиб олганмисан?», деб сўради. Мен эса аввал 4 бош, кейин 2 бош қорамол сотиб олганимни айтдим. Жавобимдан қониқмади, шекилли, мени уришда давом этди.

Қурбон Остоноевнинг маълумот беришича, уни уриб сўкишгани, ҳақорат қилишгани етмагандек бурчакка қўлини кўтартириб, тик турғизиб қўйишган.

— Нурбек исмли ходимдан сўнг ёнимга Анвар дегани келди, — дейди Қурбон Остоноев. – У ҳам ҳақорат қилди, урди. Жавобларим маъқул келмадими «противогаз» кийдириб, қийноққа сола бошлади. Худди ёш боладек чаккамга тарсаки туширарди. Ўша куни хона бурчагида қўлимни кўтартириб, турғизиб ҳам қўйишди. Ўзлари эса ухлади.

Маълум бўлишича, 2020 йил 21 январь куни кечки пайт соат 7-8 ларда туман ИИБга олиб борилган Қурбон Остоноев 22 январь куни ҳам сўроқ қилинган. Ҳатто пичоқ билан қўрқитилган.

— 22 январь куни тонг пайти Анвар исмли ходим яна сўроқ қилишни бошлади: урди, тепди, — дейди Қурбон Остоноев.— Ҳатто пичоқ ҳам тирашди. Пичоқ сопи билан бошимга уравергач, пичоқ сопи синди. Аммо уларнинг қийноғи тугамади.

Қурбон Остоноевнинг оёғидаги калтак излари
Фото: «Дарё»

Қурбон Остоноев воқеани эслашича, уни марҳум Ю.А. билан юзлаштиришган.

— Ю.А.ни кўрганимда аҳволи жуда ёмон эди, юзлари қорайиб, шишиб кетганди, — дея марҳумнинг аҳволи ҳақида эслайди Қ.Остоноев. — Афтидан, жуда кўпчилик бўлиб уришган.

Баҳром Авлиёқулов ҳам марҳумни кўрганида аҳволи ёмонлигини, юзлари қорайиб, таниб бўлмас даражага келганини айтмоқда.

— ИИБга борган пайтим аввал отамнинг олдига олиб боришди ва «Танийсанми?», деб сўрашди, — дейди Баҳром Авлиёқулов. — «Отам», дедим. Сўнг Ю.А.нинг ёнига олиб боришди. Стулда ўтирган Ю.А. орқага зўрға қаради. Юзлари шишиб, қорайиб кетган экан. Аҳволи ёмонлиги сезилиб турарди. Ёнида 4-5 нафар ИИБ ходимлари бор эди. Уни уришаётган экан.

Қурбон Остоноевнинг оёғидаги калтак излари
Фото: «Дарё»

Маълум бўлишича, Баҳром Авлиёқулов отаси Қурбон Остоноевдан бир кун кейин — 22 январь куни кечки пайт соат 7-8 ларда уйидан олиб кетилган.

— Кечки пайт соат 7-8 ларда Алишер посбон келди, ёнида ИИБ ходими ҳам бор эди, — дейди Баҳром Авлиёқулов. — «Сени олиб кетишимиз керак», дейишди. Онамга айтиб, туман ИИБга кетдик. Боргач, эшикдан «Авлиёевга», деб олиб киришди. Ичкарига кирганимиздан сўнг Алишер посбон «Сени уришади энди», дегач қўрқиб кетдим. Учинчи қаватга олиб чиқишди. Қават охиридаги хонага қамаб, калтаклай бошлашди. Ўғриликни бўйнимга олишимни сўрашди. Мен қилмаганман, деганимдан сўнг «Бўйнига олмас экан», деб ётқизиб товонимга «дубинка» билан уришди. Аввалига 2 киши калтаклади. Сўнгра 4-5 киши кириб уришди.

Баҳром Авлиёқуловнинг айтишича, у турган хонага калтакланаётган Ю.А.нинг бақирган овози эшитилган.

— Ю.А.ни бизга нисбатан ҳам кўп уришди, шекилли, баланд овозда бақирарди, — дейди Баҳром Авлиёқулов. — Уни урган ходимлар мени ҳам уришарди. Унинг кўкарган юзини, ҳолсиз танасини кўрсатиб, «Сени ҳам шу аҳволга соламиз», дейишди.

Шарофат Ўроқова
Фото: «Дарё»

Қурбон Остоноевнинг тумуш ўртоғи Шарофат Ўроқованинг айтишича, қишлоқ «участкавойи» «Эрингиз ярим соатда қайтиб келади», деб турмуш ўртоғини олиб кетгач, Қурбон Остоноев ўша кечаси уйига қайтмаган.

— 21 январь куни турмуш ўртоғим уйга келмагач, 22 январь куни эрталаб туман ИИБга бордим, — дейди Шарофат Ўроқова. — Қор ёғгани учун йўлларда роса қийналдим. Борсам, эримни «участкавой» судраб олиб кетаётган экан. Нима бўлди, десам, «Ҳозир бир нарсани сўраяпмиз, қўйворамиз», деди. Ёнимдаги 3 минг сўм пулга сомса олиб, «участкавой»га эримга беришини сўрадим. У эса эрим овқатланганини, уйга қайтиб кетаверишим кераклигини айтди. Чорасиз уйга қайтдим.

ИИБ ходимлари томонидан қийноққа солинган ота-боланинг эслашича, уларни 23 январь куни тунги соат 1:30 да қўйиб юборишган. Улар ўша пайт Ю.А.нинг ўлганидан бехабар бўлган.

Фото: «Дарё»

— Кечаси соат 1:30 да қўйиб юборишгач, қутулганимизга шукур қилиб кўчага чиқдик, — дейди Қурбон Остоноев. — Машина йўқлиги сабаб 2 соат кўчада ўтирдик. Учраган машинага қўл кўтариб, тонг азон 5 га яқин қишлоққа кириб бораверганимизда, ортимиздан 3 та Matiz борди. Бири бизни яна ИИБга олиб кетди. Билсак, Ю.А. ўлиб қолган, прокуратура эса воқеани суриштираётган экан. ИИБ ходимлари уларнинг айбини айтмаслигимизни сўрашди. Прокуратура сўроқ қилганда эса бизни уришганини тан олмади.

Қурбон Остоноевнинг маълумот беришича, уни калтаклаганлар 7-8 кишини ташкил этади. Аммо 6 нафарини таниган, 3 нафари билан прокуратура ходимлари олдида юзлаштирилган.

— Адҳам, Нурбек, Анвар исмли ходимларни яхши таниб қолдим, — дейди Қурбон Остоноев.

Марҳум Ю.А.нинг турмуш ўртоғи Гўзал Абдиеванинг «Дарё» мухбирига айтишича, турмуш ўртоғи Лангар қишлоғида содир этилаётган ўғриликда қишлоқ профилактика инспекторининг қўли борлигини билиб қолган.

Гўзал Абдиева
Фото: «Дарё»

— Қишлоқдошимиз Исроил Юсуповнинг моли йўқолгач, турмуш ўртоғимни ўғриликда айблашди, — дейди Гўзал Абдиева. — Аммо йўқолган мол Тарағай қишлоғидаги Бўриев Маҳмадалининг уйидан чиқди. Эрим шуни телефонига «сёмка» қилиб, «участкавой»га кўрсатган. Аммо «участкавой» ишни ёпди-ёпди қилган. Эрим уларнинг бир дастурхонда ўтирганини кўрган. Шунинг учун ҳам «участкавой»га «Сен ишни ёпди-ёпди қилдинг», деб кўп уришарди. Шу сабабли эримни ўлдиришди, энди менга ҳам бирор нима қилишларидан қўрқяпман.

Марҳумнинг яқин қариндоши Феруза Абдураҳмонова ҳам марҳум профилактика инспекторининг қишлоқдаги ўғриликка алоқаси борлигини билиб қолгани учун ўлдирилган деган фикрда.

— Марҳум амаким тириклигида «Мен ‘ўғриларга сизларнинг бир сирларингизни биламан, аммо буни тегишли ташкилотларга айтаман’ дедим» деганди, — дейди Феруза Абдураҳмонова. — Бу гапни ўша ўғрилар тўдасидаги одамга айтган. Амаким «участкавой»нинг ўғрилар билан биргалигини билгани учун ҳам ўлдирилган.

Феруза Абдураҳмонова, Холпошша Абдураҳмонова, Маҳмаризо Абдураҳмонов.
Фото: «Дарё»

Марҳумнинг акаси Маҳмаризо Абдураҳмонов ҳамда опаси Холпошша Абдураҳмонованинг айтишича, марҳумнинг жасадини уйига олиб келаётган ИИБ ходимлари қишлоққа кирмай, қоронғи тушишини кутган. Жасадни кўчада анча пайт ушлаб турган.

— Қоронғи тушишини кутиб, жасадни ювмай кўмишимизни хоҳлаяпсанми, деб ИИБ ходимлари билан тортишдим ва мажбурлаб қишлоққа олиб кирдим, — дейди Маҳмаризо Абдураҳмонов. – Биз келиб қолмасак, жасадни кўчада маҳтал қилиб ўтиришар экан.

Шуҳрат Абдураҳмонов
Фото: «Дарё»

Марҳумнинг акаси Шуҳрат Абдураҳмоновга кўра, Лангар қишлоғига бориб, ИИБ ходимларининг қамоққа олинганини айтган прокуратура ходими вилоят прокурорининг ўзи бўлган.

«Дарё» мухбири Чироқчи туман ИИБда ҳам бўлиб, масъуллар билан кўришишга, очиқ қолаётган саволларга жавоб олишга уринди. Аммо ИИБ масъуллари кўришишни истамаганиданми на мухбирни ичкарига қўйишди, на ўзлари чиқишди. Бу ҳам етмаганидек, ИИБ биносини суратга олаётган мухбирга атрофни кузатиб турган ИИБ ходимлари эътироз билдириб, суратга олиш мумкинмаслигини айтишди.

Чироқчи туман ИИБ
Фото: «Дарё»

Эслатиб ўтамиз, марҳум Ю.А.нинг ўлими билан боғлиқ воқеага муносабат билдирган Қашқадарё прокуратураси марҳум 2020 йил 23 январь куни соат 01:50 да вафот этганини, Чироқчи тумани ИИО ФМБ ходимларига нисбатан ЎзР ЖКнинг 206-моддаси 1-қисми ва бошқа моддалари билан жиноят иши қўзғатилиб, тергов ҳаркатлари олиб борилаётганини ёзганди.