Черногорияда Бугундан комендантлик соати кучга кирди

Черногорияда коронавирус тарқалишининг олдини олиш учун бугун, 15 ноябрдан бошлаб комендантлик соат жорий қилинди. Фуқароларнинг соат 21:00 дан 05:00 гача уйдан чиқиши тақиқланади. Бу ҳақда Черногориянинг Юқумли касалликлар бўйича миллий кенгаши маълум қилди.

Хабар берилишича, комендантлик соати 1 декабрга қадар амалда бўлади ва ундан кейин ҳам вазиятга қараб узайтирилиши мумкин.

Шунингдек, 15 ноябрдан бошлаб мамлакатдаги дўконлар ва ресторанлар фақат соат 20:00 гача ишлайди. Дам олиш кунлари бир шаҳардан бошқасига саёҳат қилиш тақиқланади. Бундан ташқари, тўрт нафардан ортиқ одамнинг йиғилишига тақиқ жорий этилади.

13 ноябрда кун давомида Черногорияда 601 кишида коронавирус инфекцияси қайд этилди. Пандемия даврида мамлакатда 26,1 минг киши коронавирус билан касалланган, 377 киши касаллик сабабли вафот этган.