Бухорода чорва-моллар ўғирлигини ўзига касб қилиб олган жиноий гуруҳнинг яна бир жинояти фош этилди
Расмий саҳифаларимизда Бухоро шаҳар «Алпомиш» кўчасида яшовчи, 1999 йилда туғилган Ш.Ш. ва Қоровулбозор тумани Тинчлик маҳалласида яшовчи 2003 йилда туғилган Қ.M. исмли шахслар олдиндан жиноий тил бириктириб, бир гуруҳ бўлиб Бухоро шаҳри ҳамда вилоятимизнинг бошқа туманларида чорва-мол ўғирликларини содир қилганлиги юзасидан маълумот берган эдик.
Ушбу жиноий гуруҳ аъзолари билан олиб борилган тезкор техник ва суриштирув ҳамда тергов ҳаракатлари давомида Бухоро шаҳрида содир бўлган яна бир жиноят фош этилди.
Гап шундаки, 2022 йилнинг 4 ноябрь кунидан 5 ноябрь кунига ўтар кечаси Бухоро шаҳар «Калтарабод» аҳоли пунктида яшовчи, 1981 йилда туғилган M.С. нинг яшаш хонадони орқа томонида жойлашган, атрофи ёғоч тўсиқлар билан ўраб олинган қўйхонасидан баҳоси 10 миллион сўмга тенг беш бош қўйлар ҳам айнан шу жиноий гуруҳ томонидан ўғирлаб кетилганлиги аниқланди ва ашёвий далиллар тегишли тартибда ҳужжатлаштириб олинди.
Ушбу жиноий гуруҳга нисбатан қўшимча айблов эълон қилиниб, улар томонидан вилоятимизнинг бошқа ҳудудлари ва қўшни вилоятларда содир этилиб, фош этилмасдан қолаётган худди шу турдаги жиноятларга алоқадорлигини аниқлаш борасидаги тезкор суриштирув ҳамда тергов ҳаракатлари давом эттирилмоқда.
