Бўстонлиқда “Green Hills Resort” янги дам олиш маскани очилди

Тошкент вилояти, Бўстонлиқ тумани, Чимбойлик қишлоғида (Оқтош) жойлашган “Green Hills Resort” янги дам олиш масканининг тантанали очилиш маросими бўлиб ўтди.

Мазкур лойиҳа Ўзбекистон Республикаси Президентининг Ўзбекистонда туризмни ривожлантириш ва хорижий инвесторларни жалб этишга доир қарорларининг Тошкент вилояти Бўстонлиқ туманидаги ижроси доирасида “SAIPRO GROUP ” компанияси томонидан амалга оширилди. Дам олиш маскани Оқтош қишлоғи яқинида жойлашган бўлиб, Оқтош “Чорвоқ” эркин сайёҳлик зонаси таркибига киради. Ҳудудда коттеж ва меҳмонхоналар, очиқ ўйин майдончалари ва ресторан мавжуд.

“Green Hills Resort” халқаро сифат ва экологик тоза стандартларга мувофиқ қурилиб, ҳам Ўзбекистон фуқаролари, ҳам хорижлик сайёҳларнинг мароқли дам олиши учун мўлжалланган. “Green Hills Resort” нафақат табиат гўзаллиги, балки ўзига хос шифобахш ҳавоси билан ҳайратга соладиган сўлим тоғ ҳудудида жойлашган. Дам олиш масканини лойиҳалаш ва қуришда табиат ва фаол дам олиш ўртасида уйғунлик яратишга алоҳида эътибор қаратилди. Ушбу масканда спорт ва ўйин майдончалари мавжуд. Хусусан, мини-футбол, шахмат, арқонли майдонча, сузиш ҳавзаси, тоғ ён-бағирлари ва сойлар бўйлаб сайр қилиш мумкин йуналишлар.

Шуни таъкидлаш керакки, “Green Hills Resort” йилнинг тўрт фаслида дам олиш учун мўлжалланган бўлиб, нафақат индивидуал ёки оилавий меҳмонларни қабул қилиш имкониятига эга, балки корпоратив тадбирлар, жумладан конференциялар, форумлар, корпоратив юбилейларни нишонлаш, teambuilding каби тадбирлар учун ҳам мўлжалланган.

Пиёдалар йўлакларини ўтказишда имкон қадар экоталабларга риоя қилинди, дараҳтлар ва атроф-муҳитга зарар етказилмади. Шуни алоҳида таъкидлаш жоизки, “Green Hills Resort” нинг асосий вазифаси ҳудуднинг сўлим табиатини сақлаб қолиш ва янада интенсив ободонлаштиришдан иборат. Бу ҳатто унинг номида ҳам ўз ифодасини топган. Бунда Ўрмон хўжалиги ҳамда Экология ва атроф-муҳитни муҳофаза қилиш давлат қўмиталари катта ёрдам бермоқда. Бу ҳаракатларнинг барчаси “Яшил Макон” умуммиллий лойиҳаси доирасида амалга оширилмоқда. Қурилиш жараёнида ҳудуддаги мавжуд барча дарахтлар сақланиб қолди, қўшимча равишда яна 800 тупдан ортиқ турли навдаги дарахт кўчатлари экилди. Айни пайтда Давлат ўрмон хўжалиги қўмитаси “Green Hills Resort” ҳудудида ўсаётган барча дараҳтларни янада асраб-авайлаш мақсадида дараҳт тури ва ёши кўрсатилган ҳолда “паспортизация”дан ўтказилмоқда.

Меҳмонлар учун турар-жой қурилишида экологик талабларга риоя қилинган. Ҳудудда жойлашган ёғоч уйлар экологик тахтадан қурилган бўлиб, уй-жой ишлаб чиқариш бўйича жаҳоннинг етакчи брендларидан бири бўлган HONKA® савдо белгиси остида Финляндиянинг Honkarakenne Oyj компанияси томонидан лойиҳалаштирилган ва етказиб берилган. HONKA® ёғоч уйлари табиий хомашё ва инновацион технологиялардан фойдаланган ҳолда қурилган. Дам олувчилар бундай уйларда шимолий ўрмонлар руҳи ва фин қарағайлари нафасини ҳис қилишади. Шу билан бирга, уйлар ўзига хос дизайн ва замонавий шароитларга эга.

HONKA® уйи Финляндиянинг марказий қисмидаги Карстула шаҳрида энг юқори сифат ва экологик стандартларга мувофиқ ишлаб чиқарилади. Бугунги кунда дунёнинг 50 дан ортиқ мамлакатларида 85 000 дан ортиқ HONKA® бинолари мавжуд. “Green Hills Resort” ҳудудида бугунги кунда 11 та коттеж меҳмонларни қабул қилишга тайёр. Келгусида коттежлар сонини 40 тага етказиш режалаштирилган.

Бундан ташқари, Honkarakenne Oyj билан ҳамкорлик доирасида “Green Hills Resort” га туташ ҳудудда лойиҳа амалга оширилмоқда. Унга кўра, HONKA® Санта Клаус қароргоҳини тақдим этади. Бу сайёҳлар ва меҳмонларни янада кўпроқ жалб қилиб, байрам кунларида қуёшли Ўзбекистонда Лапландиянинг бир бўлаги бўлган ажойиб муҳитни яратади.

Яхши ва ёқимли дам олиш омилларидан бири - бу мазали таомлар. “Green Hills Resort” ҳудудида Европа ва миллий таомларнинг бой менюсига эга ажойиб ресторан мавжуд. Профессионал ошпазлар нозик таъбли меҳмонларнинг ҳам талабларини қондира оладилар. Таомномага биринчи таомлар, гўштли таомлар, тандирда пиширилган таомлар, панжара, салатлар ва газаклар киритилган. Ресторан нафақат оилавий ёки индивидуал ташрифлар учун, балки банкетлар, байрамлар ва корпоратив тадбирлар учун ҳам мўлжалланган.

“Green Hills Resort” мавсумининг тантанали очилиш маросимида расмийлар, халқаро ташкилотлар вакиллари, шунингдек, бизнес ҳамкорлар ва тадбиркорлар иштирок этди. Маросимда Honkarakenne Oyj (Финляндия) компанияси Бош директор ўринбосари-савдо бўйича директори Мария Туренкова дам олиш маскани раҳбариятига коттежларнинг сифат стандартлари ва экологик талабларга тўлиқ мувофиқлиги тўғрисидаги сертификатни топширди.

Шундан сўнг меҳмонлар эътиборига совринли ўйинлар ва таниқли ўзбек эстрадаси юлдузлари иштироида кўнгилочар-концерт дастури тақдим этилди.

Яқин келажакда “Green Hills Resort” лойиҳасини маҳаллий ва хорижий сармоя ҳисобидан кенгайтириш режалаштирилган.

“SAIPRO GROUP ” яқин келажакда ушбу ҳудудда туризм, қишлоқ хўжалиги, экология ва спортни ўзида бирлаштирган кўп тармоқли кластер, ҳамда кичик саноат кластерини яратишни ўз олдига мақсад қилиб қўйди. Бу иқтисодиёт ривожига, ҳудуднинг экспорт салоҳиятини оширишга, қолаверса янги иш ўринлари яратишга хизмат қилади.

Шундай қилиб “Green Hills Resort” бу йўналишдаги дастлабки босқичлардан бири бўлиб, дам олиш масканида 95 та янги иш ўрни ташкил қилинди. Шундан 60 та иш ўрнига ҳудудда истиқомат қилувчи аҳоли, жумладан, аёллар ва ёшлар олинди. Таъкидлаш жоизки, мазкур лойиҳалар маҳаллий ва хорижий сармояларни жалб этиш ҳисобига амалга оширилиши режалаштирилган.