Болалар ортопедия марказида қандай мураккаб операциялар ўтказилмоқда?
Акбар Тиляков,
Республика болалар ортопедия маркази директори:
— Муассасамизда кичик ёшли беморларнинг таянч-ҳаракат тизимидаги туғма ва орттирилган деформация ҳамда нуқсонлар эрта босқичда аниқланиб, инновацион усулларда даволанмоқда.
📊 Хусусан, бундай ихтисослашган тиббий хизмат туфайли йилига минглаб бемор ўғил-қизлар соғлом ҳаётга қайтяпти. Уларда шифокорларимиз томонидан 70 турдаги операциялар ўтказилмоқда. Шундан 50 турдагиси мураккаб ва ноёб жарроҳлик амалиётларидир.
🏥 Марказ диагностик поликлиника, радиология, клиник лаборатория, анестезиология-реанимация, операцион блок ва 5 та клиник бўлимдан иборат.
🔬 Бу ерда ўзлаштирилаётган илғор даволаш усуллари йилдан-йилга кўпаймоқда. Жумладан, жорий йил илк бор номукаммал остеогенез ва бошқа тизимли касалликларда "Sofield" операцияси, товон суягини медиализацияловчи-коррекцияловчи остеотомия, бош мия фалажи оқибатида сон суягининг спастик оғир чиқишида ушбу таянч-ҳаракат нуқтасини проксимал вальгусловчи остеотомия каби мураккаб амалиётлар йўлга қўйилди.
📌 Шунингдек, россиялик профессор С. Рябых иштирокида 9 нафар беморда умуртқа поғонасининг туғма ва диспластик сколиоз касаллиги оғир даражаларини замонавий тароскопик коррекциялаш ҳамда стабилизациялаш операциялари ўтказилди.
🔎 Туркиянинг Истанбул шаҳрида жойлашган “Ҳуррият” госпитали шифокорлари ҳам марказга 2 марта ташриф буюриб, мазкур хасталикдан азият чекаётган 10 нафарга яқин ўғил-қизда худди шундай жарроҳлик амалиётларини бажарди.
👩🏻⚕️ Ўз навбатида, хорижий тажрибани муассасамиз фаолиятида татбиқ этиш мақсадида Россиянинг қатор нуфузли илмий-тадқиқот муассасаларида 8 нафар мутахассисимиз малака ошириб қайтди.
📈 Умуман, ўтган йили Республика болалар ортопедия марказига жами 21 минг 721 нафар бемор мурожаат қилган бўлса, улардан 4778 нафари стационар даволанди. 2445 нафар ўғил-қизда оператив муолажалар ўтказилди.
‼️Натижада чаноқ-сон бўғимлари дисплазияси, сон суякларининг туғма чиқиши, туғма маймоқлик ва бўйин қийшиқлиги, умуртқа поғонаси ҳамда кўкрак қафаси деформациялари, оёқ-қўлларнинг туғма ривожланиш аномалиялари сингари ортопедик касалликларга чалинган ўғил-қизларнинг саломатлиги тикланди.
