АҚШ Польшада АЭС қурмоқчи
Вашингтон Варшава билан ядро энергетикаси соҳасида шартнома тузиш ҳамда Польшада бир нечта йирик АЭСлар қуриш бўйича шартномаларни амалга ошириш ниятида. Бу ҳақда АҚШ маъмурияти вакили Польша президенти Анжей Дуданинг Вашингтонга бўлажак ташрифига бағишланган брифингда маълум қилди.
"Биз Польшага Америка технологиясини қўллаган ҳолда йирик атом электр станциялари қуришда илгарилаб кетишга имкон берадиган ядровий энергиядан тинчлик йўлида фойдаланиш соҳасида икки томонлама шартнома тузишга ҳаракат қилмоқдамиз", - деди Оқ уй вакили.
Унинг таъкидлашича, ҳозирда Америка ҳукуматининг халқаро тараққиёт бўйича молия корпорацияси АҚШнинг бошқа мамлакатларда ядровий лойиҳаларни амалга оширишига қўйилган тақиқни бекор қилиш устида иш олиб бормоқда. Бу Вашингтон ва Варшава ўртасида ядровий соҳада ҳамкорлик қилиш имконини беради.
Ўтган йил ноябрда Польша ҳукуматининг стратегик энергетика ифнраструктураси масалалари бўйича вакили Пётр Наимский Варшава 2020 йилда мамлакатдаги биринчи атом электр станцияси қурилишини молиялаштириш масаласини ҳал қилишга уринишини айтганди. Польша ҳукумати 2033 йилда биринчи реакторни ишга туширишни мўлжаллаган.
Польша 20 йил ичида олтита ядровий энергия блокини қуришни режалаштирган. Мамлакат АҚШ, Япония ва Корея Республикасини салоҳиятли ҳамкорлар сифатида кўрмоқда.
