Аллоҳни кўриб турибман деб…
Бирон ишни эҳсон билан қилиш шу ишни ихлос билан пухта ва чиройли бажаришдир. Ибодатни эҳсон билан бажаришнинг маъноси ибодатни худди Аллоҳ таолони кўриб тургандек ихлос билан ҳамда Расулуллоҳ (соллаллоҳу алайҳи ва саллам) суннатларига мувофиқ тарзда бажаришдир. Агар киши бунга қодир бўлмаса, у ўзидан содир бўлаётган ҳар бир каттаю кичик амални Аллоҳ таоло кўриб турганини ёдга олмоғи зарур.
Жаброил (алайҳиссалом) Расулуллоҳ (соллаллоҳу алайҳи ва саллам)дан: “Эҳсон нима?” деб сўрадилар. У зот (соллаллоҳу алайҳи ва саллам): “Бу гўё Аллоҳни кўриб тургандек ибодат қилишинг”, дедилар. Бу мақом сиддиқлар эришадиган мақомдир.
Уламолар айтишича, банданинг ибодатида уч мақом бор:
- Ибодатни барча шарт ва талабларига риоя қилиб адо этиш. Бунда буйруқ банданинг зиммасидан соқит бўлади.
- Юқоридаги шартларга кўра адо этиш, бироқ бунда банда Аллоҳни кўриб тургандек мукошафа денгизига ғарқ бўлади. Бу Расулуллоҳ (соллаллоҳу алайҳи ва саллам)нинг ҳолатларидирки, “Кўзимнинг шодлиги намоздадир”, деганлари бунинг содиқ гувоҳидир.
- Ибодатнинг барча шарт ва талабларига риоя қилган ҳолда, бироқ ўзи Аллоҳни кўриб тургандек эмас, балки Аллоҳ уни кўриб тургандек бир ҳолатда адо этиш. Бу мукошафа мақомидан муроқаба мақомига тушишдир.
Муроқаба – Аллоҳ таоло уни кўриб турганини банданинг ҳис қилиши. Бу эса банда учун барча яхшиликларнинг асл манбаидир. Инсон бу даражага фақат ўзини ислоҳ қилгандагина етишади. У ҳақ йўлни маҳкам тутиб, барча ишларида Аллоҳ таоло уни кўриб турганини ҳис қилса, шу ҳолатга эришади.
Муроқаба билан банда Аллоҳни таниган орифлар мақомига кўтарилади ва бу билан дунё ва охират саодатига восил бўлади.
Маърифатли зотлардан бири бундай дейди: “Кимки Аллоҳни таниса-ю, нажот топгудай амал қилмаган бўлса, у ҳақиқий бахтиқародир”.
Шайх Абдураҳмон Суламий айтади: «Абу Бакр Розий бундай деганларини эшитдим: “Кимки ўзи билан Аллоҳ таоло ўртасида тақво ва муроқабани сақламас экан, бирор нарсани кашф қилишга ва мушоҳадага етиша олмайди”».
Жунайд (раҳматуллоҳи алайҳ) айтадилар: “Кимки муроқабада тўғри бўлса, Аллоҳ таолодан олган насибасини йўқотишдан қўрқади”.
Асарларда айтилади: “Илм дарёдир, ҳикмат денгиздир, уламолар дарё атрофида айланиб юрадилар, ҳукамолар денгиз ўртасида сузадилар, орифлар эса нажот кемаларида бўладилар.
Сен ҳам мана шу орифлардан бўлгин, энг камида уларга ўхшагин ва мана бу сўзни тааммул қилгин: гарчи улардек бўлмасангиз ҳам ўзингизни уларга ўхшатинг, зеро, яхши одамларга ўзини ўхшатиш ҳам нажотдир”.
Уламолар: “Намоз ўқиётган одам хушу-хузуда ва Аллоҳ таолонинг улуғлигини ҳис қилган ҳолда бўлиши керак”, деб иттифоқ қилганлар.
Яъни, бу билан Аллоҳ таоло ушбу ояти каримада айтган хушу юзага келади:
«Мўминлар нажот топдилар. Улар намозларида ўзларини камтар тутувчилардир» (Муъминун, 1-2).
Чунки намоздаги хушу жасаддаги руҳ каби бўлади. У икки қисмдан иборат: зоҳирий ва ботиний. Зоҳирий – аъзоларни бекорчи нарсалардан тийиш ва кўзни сажда қиладиган ўринга қаратиш. Ботиний – қалбнинг қўрқиши, бўйсуниши ва унинг сокин туриши ҳамда Қуръон маъноларини тааммул қилишдан бошқа нарсалар билан машғул бўлишдан сақланиши. Расулуллоҳ (соллаллоҳу алайҳи ва саллам) намозда соқолини ўйнаган одамга: “Агар унинг қалби хушуда бўлганда эди, унинг аъзолари ҳам хушуда бўларди”, деганлар. Шунинг учун Имом Ғаззолий хушуни намознинг рукнларидан деб санаганлар.