“Air Samarkand” компаниясининг Самарқанд – Истанбул – Самарқанд йўналиши бўйича мунтазам парвозлари йўлга қўйилмоқда

Жорий йилнинг 21 мартидан “Air Samarkand” компаниясининг Airbus A321neo самолётида Самарқанд – Истанбул – Самарқанд йўналиши бўйича мунтазам рейслар йўлга қўйилади.

“Air Samarkand” компанияси ахборот хизматига кўра, биринчи босқичда рейслар ҳафтасига икки марта, душанба ва пайшанба кунлари Истанбулнинг йирик аэропортига (IST) амалга оширилади.

Илк мунтазам парвозни йўлга қўйиш ҳар қандай авиакомпания учун муҳим босқичдир. Жадвал асосида парвозларни амалга ошираётган “Air Samarkand” компанияси йўловчилар саёҳатларини самарали режалаштириш билан бир қаторда, бортда қулайлик, жаҳон даражасидаги хизмат ва тўғридан-тўғри рейсларнинг қулайлигидан баҳраманд бўлиш имкониятини беради.

Ушбу йўналишда парвоз қилувчи самолёт дунёнинг етакчи авиакомпаниялари томонидан фойдаланиладиган замонавий ва хавфсиз ҳаво кемасидир. Эксплуатация даврида “Airbus A321” ўзининг хавфсизлигини исботлади ва йўловчилар томонидан қулайлиги эътироф этилади. “Air Samarkand” парвоз вақтида шовқиннинг энг паст даражасини таъминлайдиган CFM International LEAP-1A сўнгги авлод двигателлари билан жиҳозланган “neo” замонавий модификациясини таклиф этади. Самолёт 221 та йўловчилик сиғимига эга эконом-класс ўриндиқлари билан жиҳозланган салонга эга.

Шунингдек, тез орада “Air Samarkand” Самарқанд аҳолисига Босфордаги шаҳарга саёҳат қилиш учун яна бир қулай имконият яратмоқчи.