"Аи-80" маркали бензинни "Аи-92" деб сотган АЁҚШларнинг лицензиясини бекор қилинади

Ўзбекистон Республикаси Энергетика вазири Жўрабек Мирзамаҳмудов ижтимоий тармоқларда тарқалган бензин нархининг асоссиз оширилиши билан боғлиқ хабарларга ойдинлик киритди.

“Бизнинг заводларда ишлаб чиқарилаётган ва етказиб берилаётган бензин сифати қаттиқ назорат қилинади. Истеъмолчиларга етказиб бериш жараёнида ҳам қандайдир ноқонуний хатти-ҳаракатлар бўлса, биз буни назорат қиламиз.

Бундай хабарлар келиб тушганда биз нефтинпекция ходимларини жойларга чиқарган ҳолда, бензиннинг нафақат сифатини, балки Монополияга қарши курашиш қўмитаси билан биргаликда нархини ҳам назорат қилиш бўйича чоралар кўряпмиз", - дейди вазир.

Вазирнинг таъкидлашича, бензин нархини асоссиз ошириб юборган ёки сифатсиз бензинни, қолаверса, "Аи-80" маркали бензинни "Аи-92" деб сотган АЁҚШларнинг лицензиясини бекор қилишгача бўлган чоралар кўрилади.

Шунингдек, метан газ “заправка”ларга қўйилган чекловлар даврида бензинга талабни ошишини ҳисобга олиниб, бензинни биржада сотувга чиқариш бўйича белгиланган миқдор ҳам оширилган. Ҳозирги кунгача 2 400 тонна "Аи-80" биржада сотувга чиқарилган бўлса, кечадан, яъни истеъмол ошган кундан бошлаб бу кўрсаткич 3,5 минг тоннага етказилган.