2024 йилда 10 минг нафар ёшларни немис тилига ўқитиш, уларнинг 1000 нафарини Германияга юбориш режалаштирилган

Ёшларнинг чет тилларини ва касб-ҳунар ўрганишга бўлган эҳтиёжини қондириш, уларни ички ва ташқи меҳнат бозорида рақобатбардош кадрлар сифатида тайёрлаш тизимини янада такомиллаштириш йўналишида “Келажак касблари” лойиҳаси орқали 17 минг нафар ёшлар замонавий касблар ва хорижий тилларни ўрганган бўлса, “Ибрат фарзандлари” лойиҳаси доирасидаги “Ibrat Academy” мобил иловаси ёрдамида мавжуд 22 та тилни 468 минг нафар фойдаланувчилар ўрганмоқда. Уларнинг 20 минг нафари айнан немис тили курсларини ўрганаётганларни ташкил этади.

Бу борадаги ишларни кенгайтириш, ишсиз ёшларга хорижий тилларни ўргатиш, тил биладиган, касб-ҳунарли ёшларни қўллаб-қувватлаш орқали ривожланган давлатларда юқори маошли иш билан таъминлаш ва касбий таълим олишга (Аусбилдунг) қаратилган “Германияда касбий таълим” пилот лойиҳаси ишга туширилди.

Лойиҳани амалга ошириш мақсадида Ёшлар ишлари агентлиги томонидан Германиянинг “GfM Gruppe”, “Papenburg”, “OPASCA”, GIZ (Германия халқаро ҳамкорлик жамияти) ва Speerus ташкилотлари раҳбарлари билан музокаралар олиб борилиб, ҳамкорлик йўлга қўйилди.

Дастлаб Фарғона вилояти, Марғилон шаҳри 1- ва 2-сонли Абу Али ибн Сино номидаги Жамоат саломатлик техникумлари тажрибаси асосида республика бўйича жами 33 та тиббиёт техникумида бепул немис тили курслари Олий таълим, фан ва инновациялар вазирлиги билан ҳамкорликда йўлга қўйилди. Мазкур тиббиёт техникумиларида бугунги кунда 818 нафар ҳамширалар бепул немис тили курсларида тил ўрганишмоқда. Уларнинг 64 нафари В1 даражада, 173 нафари А2 даражада, 581 нафари А1 даражада тилни ўзлаштирган.

Немис тилини ўқитишга ихтисослаштирилган нодавлат таълим муассасалари билан ҳамкорликда ҳудудлардаги ижтимоий ҳимояга муҳтож ва ишсиз ёшлардан 65 нафари сараланиб, 6 ойлик немис тили курслари харажатлари қоплаб берилди. Уларнинг 13 нафари бугунги кунда Германияда касбий таълим (Ausbildung) олмоқда. Биргина Андижон вилояти, Пахтаобод тумани, Маданият маҳалласида яшовчи Шуҳратов Аҳрорбек Германиянинг Папенбург компаниясида мехатроника йўналишида касбий таълим (Ausbulding) олиб, ҳар ойда оиласига 500 евро юборишни бошлади.

Маълумот учун: А.Шухратовга 6 ойлик немис тили ўқув курси учун Агентлик томонидан 5,6 млн сўм маблағлар тўлаб берилган.

Шунингдек, бугунги кунда 20 нафар немис тили даражасини белгиловчи сертификатига (B1, B2) эга ёшларни Германиянинг “GfM Gruppe” ташкилотига касбий таълим (Ausbildung) олиш ҳамда юқори маошли ишлар учун ҳужжатлари юборилди. Суҳбат жараёнлари ташкил этилмоқда.

Шу жумладан, Андижон вилояти, Избоскан тумани “Урганжи” маҳалласида немис тилини ёшларга чуқур ўргатиш мақсадида 20 нафар ёшлар иштирокида немис тили ўқув курси ташкил этилди. “Урганжи” маҳалласи намунаси асосида 9 444 та маҳаллада ёшлар етакчилари томонидан хатлов жараёнида Германияда ўқиш ва ишлаш истаги бор ёшлар аниқланиб уларга немис тилини ўргатиш тизими йўлга қўйилди.

Ривожланган мамлакатларда касбий таълим олиш (Ausbildung) ва ишлаш истагидаги ёшлар учун зарур маълумотларни ўзида жамлаган, лойиҳа иштирок этиш учун онлайн ариза қолдириш имконини берувчи www.xorijdaish.uz сайти ишга туширилди.

Лойиҳа доирасида 2+6 дастури ишлаб чиқилиб, янгича ёндашув асосида тилни ўргатиш тизими йўлга қўйилади. Бунда талабгорлар 2 ой ўз ҳисобларидан ўқийди, шундан сўнг тилни ўзлаштириш қобилиятидан келиб чиқиб сараланган ёшларнинг кейинги 6 ойлик курс харажатларини қоплаб бериш учун “Ёшларга оид давлат сиёсатини қўллаб-қувватлаш жамғармаси” маблағлари ҳисобидан қоплаб берилади.

Немис тилини ўрганган ёшларга тил даражасини белгиловчи сертификат олиш жараёнларида қўлайлик яратиш мақсадида жой ажратилиб павилион ташкил этилади, В2 тил даражасини қўлга киритган ёшларнинг ҳам имтихон харажатлари қоплаб беришни йўлга қўйиш режалаштирилмоқда.

Германияда касбий таълим олиш, юқори маошли иш билан таъминлаш бўйича ёшлар ўртасида доимий равишда тарғибот ишлари олиб борилади. Шунингдек, Германияга касбий таълим олиш (Ausbildung) ҳамда ишлаш учун юборилган ёшларнинг яшаш шароитлари, фаолиятини кўрсатиб бериш мақсадида телекўрсатув, мативоцион ролик ҳамда ҳужжатли фильм тасвирга олинади.

Агентлик ташаббуси билан ушбу йўналишдаги ишларни кенгайтириш орқали 2024 йилда 10 минг нафар ёшларни немис тилига ўқитиш, уларнинг 1000 нафарини жорий йилда Германия Федератив Республикасига касбий таълим олиш ва ишга юбориш режалаштирилган.