Зеленский Испанияга илк ташрифини амалга оширмоқда

Украина президенти Владимир Зеленский душанба куни Мадридга келади ва у ерда Испания бош вазири Педро Санчес билан музокаралар ўтказади.

Учрашув маҳаллий вақт билан кундузи (ГМТ 10:00) бўлиб ўтади, шундан сўнг етакчилар матбуот анжумани ўтказади, дейилади Испания бош вазирининг идораси баёнотида.

Зеленскийни саройда Испания қироли Фелипе VI ҳам қабул қилади. «Кейин қирол Фелипе ва қиролича Летиция унинг шарафига кечки овқат беради», — дейилади қироллик оиласи баёнотида.

AFP эслатганидек, бу Зеленскийнинг 2019 йилда ҳокимият тепасига келганидан бери Испанияга биринчи расмий ташрифидир. Украина президенти май ойи ўрталарида Мадридга ташриф буюришни режалаштирган, бироқ Россиянинг Харков вилоятидаги ҳужуми туфайли ташрифни кейинга қолдиришга мажбур бўлган.

Чоршанба куни Санчес Испания парламентига Мадрид ва Киев икки томонлама ҳамкорлик шартномасини имзолашга тайёрланаётганини айтди.

«Жабҳадаги вазият имкон берса, биз Украина билан мамлакатларимиз ўртасидаги иқтисодий, ижтимоий ва институционал ҳамкорликни кенгайтирувчи шартнома имзолаймиз», деди бош вазир.