Йўл қоидабузарликлари учун 12 баллик тизим қандай ишлайди?

Бу бўйича муҳокамага қўйилган Вазирлар Маҳкамаси қарори лойиҳасида қуйидагилар назарда тутилган:

✅ қоидабузарликлар учун 0,3 баллдан 2 баллгача жарима баллари ҳисобланади;

✅ жарима баллари Э-жаримабалл модули орқали автоматлаштирилган тартибда ҳисоблаб борилади. Модул 1-майга қадар ишлаб чиқилади.

✅ Ҳайдовчилар ўзларининг жарима баллари ҳақидаги маълумотларни ушбу модул ва махсус мобил илова ёки Ягона портал орқали олишади. Тўплаган ҳар бир балл ҳақида ҳайдовчига СМС хабар юборилади.

Бунда қоидабузарликлар учун қуйидаги тартибда жарима баллари белгилаш таклиф этилмоқда:

🔹 тормоз тизими, рул бошқаруви ёки уловчи қурилмалари носоз ёхуд тегишли рухсатномасиз қайта жиҳозланган транспорт воситаларини бошқариш — 0,5 балл;
🔹 фойдаланиш ман этилган, давлат рақами белгиси ўзбошимчалик билан ечиб олинган транспорт воситаларини бошқариш — 1 балл;
🔹 белгиланмаган тартибда ойналар тусини ўзгартириш, кўришни чеклайдиган қўшимча нарсалар ўрнатиш (ойналарни қорайтириш учун тегишли рухсатнома берилган транспорт воситалари мустасно) — 0,5 балл;
🔹 худди шундай ҳуқуқбузарлик маъмурий жазодан кейин бир йилда такрор содир этилса — 1 балл;
🔹 сабабсиз сигнал чалиш, белгиланмаган товуш чиқарувчи ва ёритувчи қурилмаларни ўрнатиш — 0,5 балл;
🔹 тезликни соатига 20 километрдан кўп бўлмаган катталикда ошириш — 0,5 балл;
🔹 тезликни соатига 20 километрдан 40 километргача ошириш — 1 балл;
🔹 тезликни соатига 40 километрдан 60 километргача ошириш — 1,5 балл;
🔹 тезликни соатига 60 километрдан ортиққа ошириш — 2 балл;
🔹 светофорнинг тақиқловчи сигнали ёки йўл ҳаракатини тартибга солувчининг тақиқловчи ишорасига бўйсунмаслик — 1 балл;
🔹 тезкор ва махсус хизматларнинг тўсиқсиз ўтиб кетишига халақит бериш — 0,5 балл;
🔹 йўлнинг қарама-қарши томонига чиқиш, фуқароларнинг хавфсизлигини таъминлаш учун ўзга чораларни кўришга мажбур қилувчи ҳуқуқбузарликни содир этиш — 2 балл;
🔹 тўхташ ёки тўхтаб туриш қоидаларини бузиш — 0,3 балл;
🔹 одам ташиш қоидаларини бузиш — 0,5 балл;
🔹 автобус ёки микроавтобусларда ИИО ходимлари ҳамроҳлигисиз одам ташиш, агар уларнинг ҳамроҳлигида одам ташиш шарт бўлса — 0,5 балл;
🔹 қувиб ўтиш қоидаларини бузиш — 1,5 балл;
🔹 авария ҳолатини келтириб чиқарувчи гуруҳ бўлиб ҳаракатланиш — 2 балл;
🔹 темирйўлнинг ўтиш жойларидан ўтиш қоидаларини бузиш — 1 балл;
🔹 ЙТҲ қатнашчиларининг ҳодиса жойидан кетиб қолиши — 2 балл.

✅ Агар ҳайдовчи 12 ой ичида қоидабузарлик содир этмаса, кейинги даврда биринчи марта содир этилган ҳуқуқбузарлик учун биринчи жарима балли ҳисобланмайди.

✅ Охирги қоидабузарлик учун жарима балли ҳисоблангандан кейин 6 ой давомида қоидабузарлик содир этилмаса, умумий жарима балларидан 2 балл айириб ташланади. Бунда уларнинг умумий жарима баллари 2 баллдан кам бўлган тақдирда, барча жарима баллари олиб ташланади.

✅ Ҳайдовчилар жарима баллари бўйича тегишли тартибда ЙҲХХ ҳузуридаги Маъмурий амалиёт маркази ва ҳудудий марказларга мурожаат қилишлари мумкин.

Шунга кўра, уларнинг мурожаатлари қаноатлантирлиши ёки рад қилиниши мумкин.

🗓 Мазкур қарор 2025-йил 1-майдан эътиборан кучга киради.