Хива шаҳрида ўтказилган «Қовун сайли» фестивали ғолиб ва совриндорлари тақдирланди
9-11 август кунлари бўлиб ўтган «Қовун сайли» якунларига кўра бош совринлар ғолиблари аниқланди: Хоразм вилоятининг Янгибозор тумани Гран-прини қўлга киритди ва «Тракер» автомашинаси билан тақдирланди. Биринчи ўринни эгаллаган Урганч шаҳрига «Оникс», иккинчи ўринни олган Хива туманига «Дамас», учинчи ўринни эгаллаган Урганч ва Қўшкўпир туманларига эса ҳар бирига мотоцикл совға қилинди.
«Қовунни қайта ишлаш ва сақлаш учун», «Қадимий Хоразм навларини қайта тиклаш ва янги инновацион технологияларни жорий этгани учун», «Қовунчиликда энг фойдали ва экспорт қилинадиган қовун етиштирганлиги учун», «Энг ширин экологик қовун етиштиргани учун» номинациялари бўйича ҳам ғолиблар тақдирланди.
Фестивалда Хоразм вилояти, Қорақалпоғистон Республикаси, вилоятлар ва Тошкент шаҳрининг 13 та шаҳар ва туманлари ҳокимликларининг 60 та павилонлари намойиш этилди. Иштирокчилар 125 га яқин турдаги полиз маҳсулотлари, етиштирилган мева-сабзавотлар, ҳунармандчилик маҳсулотларини намойиш этди.
