Хайп учун Абдуқодир Ҳусановни ёмонотлиқ қилаётганларга: "Шунчалик ҳам виждонсизмисиз?"

Абдуқодир Ҳусанов сўнгги кунларда ижтимоий тармоқларда асосий кун мавзусига айланди. Кимлардир уни мақтади, олқишлади, яна кимлар эса ёмонотлиқ қилишдан ҳам қайтмади.

Биз иккита воқеа атрофида фикр билдирамиз, биринчиси Абдуқодир Ҳусановга устози томонидан "Гелик" совға қилингани. Ҳамюртимиз бунга муносиб ва кўпчилик ижобий қабул қилди. Аммо айнан шу воқеа туфайли у Аббосбек Файзуллаев билан ҳам солиштира бошлашди. Аббосбек Файзуллаев ҳам Тошкентга келди, аммо унга "Гелик" совға қилишмади", "Сиқилма, Аббос, сен Абдуқодирдан ҳам зўрсан" каби аҳмоқона фикрлар, солиштиришлар бошланди. Буни ёзаётганлар эса Аббос ёки Абдуқодир ҳақида эмас, кўпроқ просмотр, лайклар умуман олганда хайп қилиш ҳақида ўйлашди. Аббосбек ва Абдуқодирни солиштириб, бирини иккинчисидан устун қўядиганлар кўпайди. Тасаввур қиляпсизми, икки ўзбек футболчисини солиштириб, провакацион фикрлар уйғотиш айнан ўзбеклардан чиқяпти. Яъни просмотр учун миллати, ғурури шаънини ҳам сотишга тайёр айрим номардлардан, пасткашлардан чиқяпти.

Энди иккинчи воқеа — "Абдуқодир Ҳусанов "Реал" футболкасига имзо чекишдан бош тортди". Айнан шу сарлавҳадаги хабарлар кўплаб сайтларда чиқди, тўлдирди ва урғу Ҳусанов айнан "Реал" футболкасига имзо чекишни истамади, дея қаратилди, тарқатилди, "Реал" мухлисларида ҳамюртимизга нисбатан қандайдир ғаразли фикрлар уйғонишига ҳам қисман сабаб бўлди бу. Ваҳоланки, бунинг сабаби оддий — Абдуқодир Ҳусанов "Манчестер Сити" билан шартномаси бор ва унда ҳамюртимиз клуби ва терма жамоамиздан бошқа клуб ёки терма жамоалар либосларига имзо қўя олмайди. Жуда оддий ва тушунарли ҳолат. Шуни сарлавҳага олиб чиқиш ва бу билан холис, тўғри хабар тарқатиш мумкин эди. Ҳамюртимизга нисбатан айрим салбий фикрлар ҳам туғилмасди. Лекин орамиздан шундай виждонсизлар ҳам борки, просмотр учун айнан Абдуқодир "Реал" формасига имзо қўйишни истамади тарзида тарқатиб, просмотр ва подписчик йиғиш пайида бўлишди.

Умуман олганда, бизда мухлислик маданияти умуман йўқ. Абдуқодир Ҳусанов атрофидаги воқеалар буни яна бир бор исботлади. Биз учун трендга чиқиш, лайклар, подписчиклар ватанпарварликдан устунроқ туради, афсуски. Албатта, инстаграмга ёки тик-токда подписчик кўпайтириш учун ўзини фоҳишаю мошенникка чиқаришдан қайтмайдиган халқдан яна нима кутиш мумкин!

Фикрларимиз анча кескин, тушунамиз, аммо бу ҳақиқат. Шунинг учун хайпсеварларга бироз виждонли бўлишни, ишига масъулиятлироқ ёндашишни маслаҳат берамиз.