Ўзбекистонда тамаки маҳсулотлари таркибига оид талаблар белгиланди
“Тамаки маҳсулотлари учун техник регламентни тасдиқлаш тўғрисида”ги Вазирлар Маҳкамаси қарори қабул қилинди. Бу ҳақда Норма сайтига таяниб, Дарё нашри хабар қилмоқда.
Ҳужжат билан тамаки маҳсулотлари учун техник регламент тасдиқланди. У 2025 йилнинг 1 январидан кучга киради. Техник регламент:
- экспорт қилишга ёки республика ҳудуди орқали транзит учун мўлжалланган;
- юридик шахслар томонидан кўргазмали намуналар, синовлар учун намуналар сифатида сотиш мақсадисиз олиб кирилган;
- жисмоний шахслар, жумладан, чет эл фуқаролари томонидан ўз эҳтиёжлари учун фойдаланиш ва кейинчалик сотиш мақсадисиз олиб кирилган тамаки маҳсулотлари ва тамакини ҳамда никотинни истеъмол қилиш мосламаларига нисбатан қўлланилмайди.
Техник регламент:
- хом ашё ва ингредиентлар;
- ташиш ва сақлаш;
- ишлаб чиқариш;
- қадоқлаш;
- тиббий огоҳлантиришларга талабларни белгилайди.
Ҳужжат тамаки маҳсулотлари учун кимёвий ва микробиологик моддалар миқдорининг йўл қўйиладиган энг юқори даражаларини белгилайди. Шунингдек, тамаки маҳсулотларининг ўрамида жойлаштириладиган тиббий огоҳлантиришлар намуналари тасдиқланмоқда.
Ҳужжат Қонун ҳужжатлари маълумотлари миллий базасида эълон қилинган ва 2024 йил 21 майдан кучга кирди.
Апрель ўрталарида Ўзбекистонга электрон сигареталар ва тамакини қиздириш тизимларини олиб кириш, реализация қилиш ва ишлаб чиқаришни тақиқлаш, ушбу ҳаракатлар учун жавобгарликни белгиловчи норматив-ҳуқуқий ҳужжат лойиҳаси ишлаб чиқилган эди.
