Ўзбекистонда афсонавий Регистонни яратган инсон Баҳодир Ялангтўш ҳақида фильм суратга олинади
Самарқанднинг Регистон майдонида “Шердор” ва “Тиллакори” мадрасаларини қуриб, шуҳрат қозонган инсон ҳақидаги фильм тақдимоти бўлиб ўтди.
Филм режиссёри “Илҳақ” фильми орқали танилган Жаҳонгир Аҳмедовдир.
Тадбир Ўзбекистон Президенти ташаббуси билан, мамлакатимиз ҳудудларида “Янги Ўзбекистон-Инсон қадри улуғланган юрт!” шиори остида ўтказилаётган маданий-маърифий тадбирлар доирасида бўлиб ўтди. Ташкилотчилар – Ўзбекистон Кинематография агентлиги ва Самарқанд вилояти ҳокимлиги.
-Баҳодир Ялантўш – миллий қаҳрамонимиз. Энди, унинг шарофати билан, бутун дунё Регистон майдонининг гўзаллиги ва улуғворлигидан баҳраманд бўлади. XV асрда Мирзо Улуғбек томонидан қурдирилган мадраса ёнида, орадан икки аср ўтиб, унинг буйруғига асосан иккита – Шердор ва Тиллакори мадрасалари қад ростлаган. Афсуски, Баҳодир Ялантўш ҳақида кам маълумотга эгамиз ва Ўзбекистон Президентининг шахсий топшириғига биноан яратилаётган фильм, меъморий меросимиз қандай яратилганини одамларга, айниқса, ёшларга сўзлаб беришга қаратилган. Мен Самарқанд вилояти ҳокимлигига ва шахсан ҳоким Эркинжон Оқбўтаевичга фильмни тайёрлашда кўрсатган кўмаги, тадбирларимизни ўтказишда ҳар томонлама ёрдам бергани учун ўз миннатдорчилигимни билдирмоқчиман, — деди фильм режиссёри Жаҳонгир Аҳмедов.
Кинематография агентлиги бош директори Фирдавс Абдухолиқов таъкидлаганидек, Самарқанд хорижлик киноижодкорларни жалб қилиш марказига айланиб кетаяпти, шаҳарнинг кино олиш макони сифатидаги нуфузи жадаллик билан ошиб бормоқда. Мана, айнан Самарқанд қўшма фильмларни суратга олиш жойига айланди. Тез орада бу ерда, ўзбек-тожик киноижодкорларининг ҳамкорликдаги “Навоий ва Жомий” фильмини суратга олишлари устида ишлар бошланади. Яқин кунларда, Самарқандда, экшн жанрида “Бу дунёда менга жой йўқ”деб номланган турк сериалини суратга олиш ишлари бошланади.
Айтиш жоизки, Самарқанд вилояти ҳокимлиги кўмагида, сўнгги бир неча йил ичида Самарқанд шаҳрида ва Самарқанд ҳақида бир қанча фильмлар суратга олинган эди. Булар: “Матонат”, “Самарқанд қовунининг ҳиди” ҳужжатли фильмларидир. “Матонат” ҳужжатли фильми, режиссёр Шуҳрат Маҳмудов томонидан суратга олинган, 101 самарқандлик аскарнинг жасорати ва инсонийлиги ҳақида ҳикоя қилувчи фильмдир. Фильм яқинда Севастополда бўлиб ўтган 31-«Золотой витязь» халқаро кинофорумида «Гран-при»ни қўлга киритган. Шунингдек, “Самарқанд қовунининг ҳиди” фильми ҳам, режиссёр Али Ҳамроев томонидан суратга олинган.
Тадбир сўнгида Самарқанд вилояти ҳокими Эркинжон Турдимовга Ўзбекистон Кинематография агентлигининг “Ўзбекистоннинг кино санъати” китобининг совға нашри топширилди.
Кинематография агентлиги ахборот хизмати.
