Ўзбек киноижодкорлари Озарбойжон кинофондига ташриф буюришди

Ўзбекистон Республикаси Кинематография агентлиги ва Озарбойжон Республикаси Маданият вазирлиги ташаббуси билан жорий йилнинг 7-10 декабрь кунлари Боку шаҳрида Ўзбек киноси кунлари бўлиб ўтмоқда.

6 декабрь куни бир гуруҳ киноижодкорлар Озарбойжон пойтахтига етиб келишди. Кинематография агентлиги бош директори Фирдавс Абдухолиқов раҳбарлигидаги ҳайъат таркибидан Ўзбекистонда хизмат кўрсатган артист Лола Элтоева, кинорежиссёрлар Элдор Мамедов, Дилмурод Масаидов, киножурналистлар Феруза Нодирова, Шоира Рауфбоева ва бошқалар ўрин олган.

Ижодий гуруҳ Озарбойжон миллий кино фондига ташриф буюрди. Кино фонди раҳбари Жамил Гулиев икки мамлакат кино фонди усталари ҳамкорлиги узоқ тарихга эга эканлиги, сўнгги йилларда бу ҳамкорлик тобора ривожланиб бораётганини қайд этди.

Ўзбекистон Республикаси Кинематография агентлиги бош директори Фирдавс Абдухолиқов самимий қабул ва меҳмондўстлик учун миннатдорлик билдириб, хамкорлик учун барча имкониятлар сафарбарлик қилинишини таькидлади.
Учрашувга Фирдавс Абдухолиқов Озарбойжон миллий кино фонди раҳбарига "Ўзбекистон кино санъати" китоб-альбомини тақдим этди.

Кино фонди раҳбари фонд архивида сақланаётган ноёб фотосуратларни кўрсатди. Улар орасида ўзбек киноси тарихидан ҳикоя қилувчи суратларнинг кўплиги эътиборни тортди.

Бу ерда кинорежиссёр Ёлқин Тўйчиев суратга олган "Фариданинг 2000 қўшиғи" фильми намойиш қилинди.

Кино кунлари доирасида озарбойжонлик кино мухлисларига "Азалий дўстлик ва қардошлик", "Аёл қисмати", "Барон 2: Соғинч", "Мақсуд Шайхзода" сингари бадиий ва ҳужжатли фильмлар намойиш этилиши кутилмоқда.