«Ўзаро ҳамкорлик орқали Қирғизистон ва Ўзбекистоннинг чегараолди ҳудудларини ривожлантириш» лойиҳаси амалга оширилмоқда
Бирлашган Миллатлар Ташкилотининг (БМТ) Озиқ-овқат ва қишлоқ хўжалиги ташкилоти (FАО) ва Аҳолишунослик ташкилоти (UNFPA) 2022 йилдан «Ўзаро ҳамкорлик орқали Қирғизистон ва Ўзбекистоннинг чегараолди ҳудудларини ривожлантириш» БМТ қўшма лойиҳасини биргаликда амалга оширишни бошладилар. Лойиҳанинг бошланғич нуқтасида чегараолди ҳудудларда иқтисодий имкониятларни ошириш мақсадида ўзаро ёрдам гуруҳлари тузилди.
Бугунги кунга қадар лойиҳа доирасида жами 32 ўзаро ёрдам гуруҳлари ташкил қилиниб, БМТнинг лойиҳа ташкилотлари 2023 йилда ҳам ушбу гуруҳларни қўллаб-қувватлашда давом этмоқда. Хусусан, 2023 йил март – сентябрь ойларида Иқтисодий салоҳиятни ошириш дастури доирасида гуруҳ аъзоларининг тадбиркорлик кўникмаларини ошириш ва асбоб-ускуна билан таъминлаш кўзда тутилган.
Бу сафар асбоб-ускуна билан қўллаб-қувватланадиган энг сара бизнес ташаббусларни танлаб олиш учун Наманган ва Андижон шаҳарларида 2023 йил 16-17 март кунлари Pich-dek тадбири ўтказилди. Тадбирда ўзаро ёрдам гуруҳларининг етакчилари ўз гуруҳларининг бизнес режаларини ҳакамлар ҳайъатига тақдим қилди ва энг сара бизнес ташаббуслар лойиҳа томонидан тақдирланди.
Тадбир доирасида Наманган вилояти Косонсой туманининг Хонқўрғон ва Ободон маҳаллалари, Янгиқўрғон туманининг Дўстлик ва Қайроқи маҳаллалари ҳамда Андижон вилояти Марҳамат туманининг Йўламатол ва Қорабоғич маҳаллаларидан иштирок этган 3 тадан 4 тагача бўлган гуруҳларнинг бизнес ташаббуслари ҳакамлар ҳайъатига тақдим этилди.
БМТнинг «Ўзаро ҳамкорлик орқали Қирғизистон ва Ўзбекистоннинг чегараолди ҳудудларини ривожлантириш» қўшма лойиҳаси БМТнинг Тинчлик ўрнатиш жамғармаси томонидан молиялаштирилаётган бўлиб, БМТнинг Озиқ-овқат ва қишлоқ хўжалиги ташкилоти (FАО) ва БМТнинг Аҳолишунослик бўйича жамғармаси (UNFPA) томонидан биргаликда амалга оширилмоқда.
Қўшма лойиҳа Ўзбекистоннинг Андижон ва Наманган вилоятлари, Қирғизистоннинг Ўш ва Жалолобод вилоятларининг чегараолди қишлоқларида амалга оширилаётган бўлиб, чегараорти экологик ва ижтимоий-иқтисодий ҳамкорликни ривожлантиришга қаратилган. Бунда тинчлик ўрнатишнинг муҳим агентлари сифатида аёллар ва ёшларнинг имкониятларини кенгайтириш асосий йўналишлардан бири сифатида белгилаб қўйилган.
Чегаролди ҳудудларда иқтисодий фаровонликнинг ошиши қўшни мамлакатлар билан дўстона муносабатларнинг мустаҳкамланишининг асосий омилларидан бири ҳисобланади. Бунда аёллар ижтимоий фаоллигининг ошиши ва даромад олиш имкониятларининг кенгайиши муҳим аҳамият касб этади.
