Тошкентда пора билан қўлга тушган инспекторга ҳукм ўқилди

Коррупция барча ислоҳотлар илдизига урилаётган болта экани ва унга қарши курашиш борасида тинимсиз ишлар олиб борилаётганига қарамай, нафс балосига енгилаётганлар учраши дилни хуфтон қилади...

Судланувчи 2021 йилнинг апрелидан туман Ички ишлар органлари фаолиятини мувофиқлаштириш бўлими 1-сон ҳуқуқбузарлик профилактикаси бўлинмаси профилактика катта инспектори лавозимида фаолият юритган. У тумандаги Маҳалла фуқаролар йиғини ҳуқуқ тартибот масканида ҳуқуқбузарлик ва жиноятчиликнинг олдини олишга масъул эди. Аммо у хонадонига ижарачи қўйган уй эгасидан 500 000 сўм пора талаби билан ўзининг хизмат ваколатини суиистеъмол қилган...

“ҲАРАКАТЛАРИ ШУБҲА УЙҒОТДИ”

Воқеа тафсилотларини судда уй эгаси қуйидагича баён этди:

— Оилавий шароитим оғирлиги сабабли отамнинг номида бўлган уйни олти нафар талаба қизларга ҳар ойда 3.000.000 сўм ижара ҳақи тўлаш шарти билан ижарага бергандим. Бироқ улар билан нотариал тартибда ижара шартномаси расмийлаштирмаганман. Орадан 3-4 кун ўтиб, бир йигит қўнғироқ қилиб, ҳудуд профилактика инспектори хонасига боришимни айтди. Борганимда, ўзини ушбу маҳалла профилактика инспектори деб таништирди. “Уйга ноқонуний тарзда фуқароларни ижарага қўйибсиз”, деб тушунтириш хати ёздирди. Ижарада турган қизларни чақиртиришини айтди. Ижарачи қиз келиб, ҳолат юзасидан тушунтириш хати ёзиб берди. Менга “мана ҳужжатлар”, дея қўли билан кўрсатиб, 1.500.000 сўм жарима тўлашимни айтди. Унга “ҳозир шароитим оғир”, дедим. У бўлса, “турмуш ўртоғингизни чақиртириб, ўзим гаплашиб оламан”, деди. Хўжайиним кела олмаслигини айтиб, нима гапи бўлса ўзим билан гаплашишини билдирдим. 500-600 минг атрофида жарима тўлашим кераклигини, бошқа ҳеч ким бу ишни ҳал қилмаслигини айтди. Пулни уларнинг ўзига тўлашим ва расмийлаштирилган ҳужжатлар ўзида туришини, пулни олиб келиб берганимдан сўнг мени бошқа умуман безовта қилмаслигини қистириб ўтди. Орадан бир неча кун ўтиб, ижарада турган қизлар қўнғироқ қилиб, “профилактика инспектори қўнғироқ қилди. Бизга жарима ёзилибди, тўлаб кетишимиз керак экан”, дейишди. Профилактика инспекторига қўнғироқ қилиб, қизларга нимага жарима ёзганини сўрадим. “Вақтинча рўйхатда турмасдан уйингизда яшаётгани учун жарима тўлашлари керак, гапни кўпайтирманг”, деб хайрлашди. Ҳаракатлари шубҳа уйғотди. Унинг гапларини диктофонга ёзиб олиб, ҳуқуқни муҳофаза қилувчи органларга тақдим этиш учун яна профилактика инспектори хонасига бордим. “Қизларни безовта қилманг, қанча пул беришим керак”, десам 540 000 сўм бўлишини айтди. Сал келиштиришини сўраганимда, “500 000 сўм беринг”, деди. Қайси куни кўришишимизни айтиб хайрлашдим. Сўнг ички ишлар ходимининг қонунга хилоф хатти-ҳаракатларига чек қўйиш мақсадида тегишли органга ариза билан мурожаат қилдим. Ўтказилиши режалаштирилаётган тезкор тадбирда ўз хоҳишим билан иштирок этишимни билдирдим. Аризамга асосан менга 500 000 сўм пул ва бўлиб ўтадиган суҳбатларни ёзиб олиш мақсадида овоз ёзиш мосламасини ҳам холислар иштирокида баённома асосида тақдим қилишди.

Профилактика инспектори хонасига кирдим. 500 000 сўмни кўрсатиб, “бўлдими, бошқа бизни безовта қилмайсизми?” деб пулни унга бердим. Санамай китобнинг ичига солиб қўйди. Тезкор ходимлар холислар иштирокида профилактика инспекторининг хонасига кириб, уни ушлашди.

Судланувчи айбига иқрор...

Судланувчи собиқ инспектор суд мажлисида айбига тўлиқ иқрорлиги ва қилмишидан қаттиқ пушаймонда эканини билдирди. Унга қилмишига яраша жазо тайинланди.

Жамолиддин НАЖИМОВ, жиноят ишлари бўйича Олмазор туман суди судьяси:

— Судланувчи Жиноят кодексининг 210-моддаси (пора олиш) 1-қисмида назарда тутилган жиноятни содир қилганликда айбли деб топилди. Шу модда билан 3 йил озодликдан маҳрум қилиш жазоси ҳамда 2 йил муддатга мансабдорлик билан боғлиқ ишларда ишлаш ҳуқуқидан маҳрум қилиш жазоси тайинланди. Жазони манзил колонияларда ўташ белгиланди.

Садоқат АЛЛАБЕРГАНОВА