Тошкентда электрон тижорат платформалар орқали пиротехника воситаларини сотиб келган шахс ушланди
Божхона қўмитасининг Контрабандага қарши курашиш бошқармаси томонидан Давлат хавфсизлик хизмати ва Миллий гвардия ходимлари билан ҳамкорликда ўтказилган навбатдаги тезкор тадбирда пиротехника воситаларини электрон тижорат платформалари орқали сотиб келаётган шахс тўхтатиб қолинди. Бу ҳақда Давлат божхона қўмитаси матбуот хизмати хабар берди.
Қайд этилишича, аввалдан кузатувга олинган шахс 108 дона салютларни қабул қилиб, ўзи бошқарувидаги Spark автомашинасига юклаётган вақтида тўхтатиб қолинган. Тезкор тадбир пойтахтнинг Юнусобод туманида давом эттирилиб, ушбу шахснинг хонадони кўздан кечирилганида бу ерда ҳам 12 номдаги 1382 дона салютлар сақланаётгани маълум бўлган.
Суриштирувлар давомида аниқланишича, қонунбузар шахс пиротехника воситаларини асосан электрон тижорат платформалари орқали мижозларга пуллаб келган. Шундай қилиб мазкур ҳолатда қиймати 350 миллион сўмлик жами 1490 дона пиротехника воситалари ашёвий далил сифатида олиб қўйилган.
Рақамларга кўра, 2023 йилнинг ўтган даври мобайнида божхона органлари томонидан аниқланган 85 та ҳолатда қиймати салкам 2,2 миллиард сўмлик 1 миллион 951 минг дона пиротехника воситаларининг ноқонуний олиб кирилиши ва ички ҳудуддаги яширин айланмасига чек қўйилган.
