Таниқли бошловчи Канделаки Қирғизистонни ҳақорат қилди
Қозоғистон билан бўлган жанжаллардан сўнг таниқли россиялик телебошловчи Тина Канделаки Қирғизистон билан муносабатларда можаро қўзғатди. Панфилов дивизияси музейининг бузилиши унга ёқмади.
Канделаки ўзининг ТГ каналида музейнинг бузилиши Москвани немис қўшинларидан ҳимоя қилган аскарларнинг хотирасига тупуриш бўлганини ёзди. Унинг фикрича, бу русофобиянинг кўриниши бўлиб, унга баъзи Ғарб давлатлари замин тайёрлаган.
Қирғизистон президенти матбуот хизмати раҳбари Дайирбек Ўрунбеков бунга жавобан бундай баёнотлар икки давлат муносабатларига путур етказади, деди. У музей биноси яроқсиз ҳолатда эканлигини, уни бузишдан бошқа чора йўқлигини таъкидлади.
«Мен Тина Канделакига бундай баёнотларни эълон қилишдан олдин, мамлакатимиз тарихини ўрганишни, бизга ташриф буюришни маслаҳат бермоқчиман, ишончим комилки, унинг фикри 180 даража ўзгаради ва у бошқа бундай қилишига ҳеч қачон йўл қўймайди», - дея иқтибос келтиради РБК.
