Сирдарё вилоятида янги иссиқлик электр станция ишга туширилди
Энергетика вазирлиги ахборот хизматининг маълум қилишича , Сирдарё вилоятининг Ховос туманида қурилган, қуввати 220 МВт бўлган янги газ-поршенли иссиқлик электр станцияси бугун, 20 ноябрь куни Ўзбекистоннинг ягона электр тармоғига қувват узатишни бошлади.
Мазкур электр станция йилига 1,7 млрд кВт-соат электр энергияси ишлаб чиқаради.
Станцияда ўрнатилган қурилмаларнинг фойдали иш коэффициенти юқорилиги ҳисобига йилига 150 млн метр куб табиий газ тежалади. Тежалган табиий газ билан қўшимча 685 млн кВт-соат электр энергияси ишлаб чиқариш имкони яратилади.
Аҳамиятлиси, станция қурилиши давомида 700 нафаргача, ишга тушгандан кейин эса 100 нафар янги иш ўрни яратилди.
Эслатиб ўтамиз, жорий йилнинг 29 март куни Ўзбекистон ва Туркия Президентлари томонидан мазкур электр станция қурилишига старт берилган эди .
