Самарқандда аканинг жиноятини "тўғриламоқчи" бўлган ука жиноят устида қўлга тушди

Самарқанд вилояти ИИБ Хавфсиз туризмни таъминлаш бошқармаси тезкор ходимлари томонидан Тайлоқ тумани марказида ўтказилган тезкор тадбир давомида Самарқанд шаҳар “Имом Восе” маҳалласида яшовчи Х.Д. чет давлатга кетиши ва авиачипта олиши учун керак бўладиган “COVID-19” вируси мавжуд эмаслиги тўғрисидаги тест таҳлилини сохталаштирган ҳолда 180.000 сўмга сотган вақтида далилий ашёлар билан ушланиб, расмийлаштирилган. Бу ҳақида Самарқанд вилояти ИИБ Ахборот хизмати хабар қилади.

Қайд этилишича, ушбу ҳолат юзасидан терговга қадар текшириш ҳаракатлари олиб бориш жараёнида фуқаро Х.Д. нинг укаси ҳолатни расмийлаштирмаслик ва ишни ижобий томонга ҳал қилиб бериш эвазига тезкор ходимга 5 минг АҚШ доллари миқдоридаги пулларни пора сифатида таклиф қилган.

Ходим фуқарони пул таклиф қилиш, жиноят иши қўзғатилиб, жавобгарликка тортилишига сабаб бўлиши тўғрисида огоҳлантиришига қарамай, у кейин келиб учрашишини айтиб чиқиб кетган. Ходим ҳолат юзасидан бошқарма бошлиғига билдирги билан мурожаат қилган.

Билдиргига асосан, ИИВ Ўз хавфсизлиги бошқармаси Самарқанд вилояти бўйича бўлими ҳамда Самарқанд шаҳар прокуратураси ходимлари томонидан тезкор тадбир ўтказилиб, фуқаро И.Х. тезкор ходимга 5 минг АҚШ долларини пора тариқасида берган вақтида ашёвий далиллар билан ушланган.

Ҳозирда мазкур ҳолат бўйича Самарқанд шаҳар прокуратураси томонидан жиноят иши қўзғатилиб, дастлабки тергов ҳаракатлари олиб борилмоқда.