Россия депутати туғилишни ошириш учун тунда интернетни ўчиришни таклиф қилди

Замонавий ёш жуфтликлар тобора камроқ катта оила қуриш ҳақида ўйлашмоқда, бўш вақтларини эса гаджетлар ва ижтимоий тармоқларда ўтказишни афзал кўришмоқда. Бу ҳақда “Абзац” нашрига Брянск вилоят думасининг депутати, “Православ Россия” ҳаракати раиси Михаил Иванов маълум қилди. Унинг сўзларига кўра, бу муаммони ҳал қилиш учун фарзандсиз оилаларнинг интернетга киришини чеклаш керак.

Депутатнинг айтишича, гап интернетни тўлиқ тақиқлаш ҳақида эмас, балки кечки вақтларда рақамли тийилиш (чегаралаш) ҳақида кетмоқда. Масалан, соат 23:00 дан 02:00 гача бўлган оралиқда.

“Интернет янги турдаги қарамликка айланган, бу эса оилавий қадриятларни емиради. Ёшлар бир-бирлари билан мулоқот қилиш, муносабатлар қуриш ва фарзанд ҳақида ўйлаш ўрнига соатлаб лента варақлайди, ўйин ўйнайди ёки сериал томоша қилади. Бу шунчаки зарарли одат эмас, бу – мамлакат демографик хавфсизлигига таҳдиддир. Биз ёш жуфтликлар ўзаро мулоқотга ва онгли ота-оналикка қайтиши учун шароит яратишимиз керак”, – деди Иванов.

Спикернинг таъкидлашича, расмийлар илгари ҳам ёшлар орасида интернетга қарамлик муаммосини кўтаришган. Хусусан, Давлат Думасининг вице-спикери Олга Эпифанова ижтимоий тармоқларда вақт ўтказиш индивидуализмни кучайтириб, анъанавий оилавий қадриятларга путур етказишини айтган.

Иванов бу ташаббусни цензура ёки эркинликни бостириш деб эмас, балки жамият фаровонлигига қаратилган оқилона тартибга солиш деб атади. “Агар кимдир фарзанд кўришни истамаса, бу – унинг танлови, лекин давлат оилавий қадриятлар устувор бўлиши учун керакли шарт-шароитларни яратишга ҳақлидир”, – дея қўшимча қилди у.

“Биз бу ташаббусни интернет провайдерлари ва ижтимоий хизматлар кўмагида ихтиёрий тажриба сифатида бошлашимиз мумкин. Маҳалла нозирлари ва оилавий психологлар жуфтликларга тирик мулоқот ва онгли оила қуриш муҳимлигини тушунтиришда ёрдам бера олишади. Биз тотал назоратни жорий этишни эмас, балки ёшлар тунларини телефонда эмас, бир-бирига эътибор қаратишга сарфлаши учун рағбатлантирувчи чоралар кўришни таклиф қилмоқдамиз. Россия ҳар доим мустаҳкам оилалари билан фахрланган. Бизнинг вазифамиз – бу анъанани тиклаш. Агар бу учун вақтинча кечқурун кўнгилочар контентга киришни чеклаш керак бўлса, бу – миллат келажаги учун арзимас тўлов”, – дея якунлади Иванов.

Аввалроқ, Россия православ черкови руҳонийси Андрей Ткачёв 40 ёшдан ошган ва фарзандсиз бўлган россияликларни солиқ билан жазолаш таклифини билдирган эди. Унга кўра, бундай чора уларнинг турмуш тарзини “стигматизация” қилишга хизмат қилиши керак.

Бироқ, Давлат Думасининг оила ишлари бўйича қўмитаси ҳузуридаги жамоатчилик кенгаши аъзоси, “Иван Чай” анъанавий оилавий қадриятларни ҳимоя қилиш маркази раҳбари Элина Жгутова бу ғояни танқид қилди.

Ҳуқуқ ҳимоячисининг фикрича, жазоловчи характерга эга бўлган жарималар кечиккан муносабатлар муаммосини янада чуқурлаштиради, чунки эркаклар мажбуран уйланишни истамайдилар. Унинг фикрича, бундан кўра самаралироқ чоралар – жамиятнинг “феминизациялашуви”га қарши курашиш бўлади.

Фаолнинг айтишича, эркаклар ҳуқуқларини доимий қўллаб-қувватлаш ва уларни ҳимоя қилишга йўналтирилган қонунлар қабул қилиш соғлом ижтимоий муҳитни шакллантиришга ёрдам беради ва бахтли муносабатлар учун замин яратади.