Оқ уй ўз дипломатларига Путиннинг инаугурация маросимида қатнашмасликни буюрди

Америка маъмурияти АҚШнинг Москвадаги элчихонаси вакилларига Россия президенти Владимир Путиннинг инаугурацияси маросимида қатнашмасликни буюрди.

Бу ҳақда Оқ уй матбуот котиби Карин Жан-Пьер журналистлар учун навбатдаги брифингда маълум қилди.

Унинг сўзларига кўра, АҚШ раҳбарияти “ўз элчихонасига инаугурация маросимида қатнашмаслик ҳақида кўрсатма берган”. Жан-Пьерга кўра, АҚШ шу тариқа Украинадаги урушга норозилик билдирган.

"Ўйлайманки, биз ўзимизни аниқ ифодаладик, қўшадиган ҳеч нарсам йўқ", - дея хулоса қилди Оқ уй матбуот котиби.

Эслатиб ўтамиз, 7 май куни Москвада Россия етакчиси Владимир Путиннинг инаугурацияси бўлиб ўтди. У бешинчи марта Россия президенти лавозимини эгаллади.