Оқ уй Байден ва Путин нималар ҳақида гаплашишини очиқлади
16 июнь куни Женевада бўлиб ўтадиган учрашув пайтида Россия ва Америка раҳбарлари Владимир Путин ва Жо Байден ўртасидаги музокараларнинг тахминий мавзулари айтиб ўтилди.
Мавзулар доирасини Оқ уй вакили, АҚШ Миллий хавфсизлик кенгашининг Россия ва Марказий Осиё бўйича директори Эрик Грин баён қилди, деб хабар беради “Интерфакс”.
Унга кўра, Америка раҳбари стратегик барқарорликни таъминлаш, киберхавфсизлик ва Америкадаги, Россиядаги дипломатик ваколатхоналари фаолияти мавзуларига тўхталмоқчи. Шунингдек, Эрон, Шимолий Корея, Сурия, Афғонистон, Арктика, иқлим ўзгариши муаммоси ҳам муҳокама қилинади. Байден, шунингдек, "Россияда ушлаб турилган Америка фуқаролари" масаласини кўтариш ниятида ва "Россиядаги Америка дипломатик муассасаларига чекловларни" муҳокама қилишни режалаштирмоқда, дея қўшимча қилди Грин.
