Олға, Германия, яшасин, Ўзбекистон!

Айни дамда Россияда ўтаётган футбол байрамини кўпчилик катта қизиқиш билан кузатмоқда. Ҳар ким ўзи зўр деб ҳисоблаётган жамоанинг ўйинини кузатиш, турли тахминлар қилиш билан банд. Дунёнинг 30дан ориқ мамлакатидан келган футбол жамоаларининг қай бири якунда биринчиликни қўлга киритиши борасида айни дамда якдил бир фикрни айтиш қийин. Чунки бу йид яққол фаворит, тўхтатиб бўлмайдиган кучга эга жамоанинг ўзи йўқ ҳозирча.

Ўзбек футболи мазкур чемпионатга ҳар томонлама қулай ва натижаси ёқимсиз бўлмаган жамоани жўнатганидан хабарингиз бор. Ўзбекистон жамоаси бу – 90 дақиқа майдонда югурса ҳам оёғига бир мартагина бўлсин тўп тегмайдиган жамоа. Ўзбек жамоаси – бу чўнтагида иккита рангдор карточкаси ва бўйнида ўйинни таққа тўхтатишга қодир бўлган ҳуштаги бўлган жамоа. Атиги бир неча кишидан иборат бўлса-да, ҳар қандай ўйиннинг тақдирини ҳал қилишга қодир бўлган жамоа. ЖЧ-2018 ўйинларидаги Ўзбекистон жамоаси – бу Равшан Эрматов бошлиқ ҳакамлар жамоаси. Аммо ҳозирги фикрларимиз ўзбек футболи тўғрисида эмас. Балки футбодаги кутилмаган «ўйинлар», амалдаги чемпионларнинг кутилмаганда ер тишлагани тўғрисида.

Россияда ўтаётган футбол бўйича Жаҳон чемпионати кутилмаган натижалари билан кўпчиликнинг тахминларини пучга чиқарди. Мессининг ноаниқ зарбаси, Роналдунинг жамоасига ғалаба бера олмаган қўша қўша голлари ва кутилмаганда амалдаги чемпионнинг Мексикадан мағлубиятга учраши… Энг кўп ҳайрон қолдиргани, энг кўп алам қилгани ҳам аслида мана шу бўлди, назаримда.

Германия терма жамоаси Мексика билан ўйинда кутилмаганда ўзини бошланғич синф ўқувчилари каби тутди. Жамоа ўйинчилари майдон ҳаяжони ва томошабинлар юки таъсирига тушгани яққол сезилди. Германия – чемпионатлар учун яратилган ўлканинг 11 азамат ўйинчисига Россиянинг ҳавоси маъқул келмади шекилли. Ёки стадион чимларига нимадир бўлдимикан… Балки, Мексикаликларнинг бўйлари баландлик қилгандир? Бу каби мағлубиятни ҳашпўшловчи баҳоналар ўзбек термасида тез-тез кузатилади. Лекин биз Германия ҳақида гаплашяпмиз. Чемпионатларнинг камида чорак финалига чиқиш пешонасига ёзиб қўйилган жамоа тўғрисида.

ЖЧ – 2018 илк ўйинида немис машинасининг панд беришини кўпчилик кутмаган эди. Аммо, бу содир бўлди.

Статистика жиҳатидан Германия ўйинда ғалабага эришди. Тўпни ўзида сақлаб туриш, зарбалар йўллаш бўйича Мексика устидан чин маънода ғалаба қозонилди. Аммо, футболда натижа муҳим. Аниқ йўлланган биттагина зарба эвазига Мексика уч очкони илиб кетди. Ана шундай аниқ зарбаларнинг яна учтаси гол билан тугамагани эса Германиянинг омади бўлди. Катта ҳисобдаги шармандали мағлубият немисларнинг кейинги ўйинларига ҳам таъсир кўрсатиши мумкин-да!

Ўзбек футбол мухлисларига, Германиянинг қайта чемпион бўлишини истаётган ҳамюртларимизга илк мағлубият фикрларини ўзгартирмаслигини сўраган бўлардик. Немис машинаси ҳали тўлиқ ишга тушгани йўқ. Илк мағлубиятни сабаб қилиб улар тўғрисида якуний фикр билдиришга ҳали эрта. Ахир, узоқ йиллардан буён чемпионат ҳавосидан нафас олаётган немис мураббийси жамоасининг бу қадар оддий забт этилишига рози бўлмаслиги аниқ. Германия ҳали оёққа туради ва чемпионатда ҳеч бўлмаганда чорак финалгача шаҳдам қадам ташлай олади. Ҳархолда, шундай натижага яхши гумондамиз.

Хуллас, агарда футбол мухлиси бўлсангиз ва айни кунларда Германия термасининг ғалабасига умид қилиб турган бўлсангиз, сизга битта яхши маслаҳат! Бордию, немис машинаси ишончингизни оқламаса, уларни йўлда оддийгина майда тошлар ҳам тўхтатиб қолаётганидан дарағазаб бўлишга шошилманг. Шунчаки, ўзбек ҳакамлар жамоасига мухлислик қилишни бошланг, тамом. Сизда асаббузарлик ҳам, мағлубият аламлари ҳам асло бўлмайди. Олға, Германия, яшасин, Ўзбекистон!

Manba: hordiq.uz