Оғир атлетика бўйича Европа чемпиони Исломни қабул қилди

Оғир атлетика бўйича 2018 ва 2019 йилларда Европа чемпиони, латвиялик оғир атлетикачи Ребека Коха ўзининг мусулмон бўлганлигини эълон қилди.

22 ёшли спортчи мухлисларидан унинг қарорини ҳурмат қилишни ва яланғоч тана қисмлари кўринадиган фотосуратларини энди чоп этмасликни сўради. Коха Инстаграмдаги барча фотосуратларни олиб ташлади ва ҳижобда бўлган фақат битта фотосуратини қолдирди.

“Мен ҳаётимда энг муҳим қарор қабул қилдим. Мен бахтли ва миннатдорман, деб айта оламан. Тўғри иш қилганимга аминман.

Мен сўраган ягона нарса - бу ҳурмат. Агар айтадиган яхши гапингиз бўлмаса, гапирмаганингиз яхшироқ бўлади.

Бугун мен учун алоҳида кун, чунки мен мусулмон бўлдим. Мен шаҳодат калимасини айтдим ва Исломни қабул қилдим. Шу дақиқадан аминманки, менинг ҳаётимда янги, гўзал қисм бошланади.

Шу муносабат билан сиздан сочларим, қўлларим, бўйинларим ва оёқларим кўринадиган фотосуратларни нашр қилмаслигингизни ёки тарқатмаслигингизни сўрайман", деб ёзди Коха.

Шу йил бошида Коха қатарлик диск отувчи Муҳаммад Иброҳим Муозга турмушга чиқмоқчи экани маълум бўлди.