NYT: "Трампнинг Украинадаги келишув бўйича режаси Путиннинг таклифларига ўхшайди"
АҚШнинг собиқ президенти Дональд Трампнинг Украинадаги можарони ҳал қилиш бўйича АҚШ вице-президенти лавозимига Республикачилар партиясидан номзод Ж.Д.Вэнс томонидан илгари сурилган режаси Россия президенти Владимир Путиннинг режасига "объектив жиҳатдан ўхшаш". Бу фикрни Американинг The New York Times газетаси билдирган.
"Вэнс Украинадаги урушни тугатиш учун тинчлик режасини ишлаб чиқди. Аммо объектив нуқтаи назардан, бу Владимир Путиннинг режасига жуда ўхшайди", - деб ҳисоблайди нашр.
Бундан олдин Вэнс Шоун Райан шоу подкастида Оқ уйнинг собиқ раҳбарининг Россия-Украина можаросига барҳам бериш режаси ҳақида гапирди.
Вэнснинг фикрича, Трамп Россия, Украина ва Европа вакилларини тинчлик келишуви қандай бўлиши ва у қандай бандларни ўз ичига олиши кераклигини аниқлаш учун таклиф қилади.
АҚШ вице-президенти лавозимига номзоднинг таъкидлашича, келишув Украина ва Россия ўртасидаги демаркация чизиғини ўз ичига олиши керак, у ерда демилитаризация қилинган ҳудуд каби нарса яратилади. Москва, шунингдек, Киевдан НАТО ва бошқа иттифоқчи институтларга қўшилмаслиги ҳақида кафолат олади, деб ҳисоблайди Вэнс.
14 июнь куни Россия президенти Владимир Путин Ташқи ишлар вазирлиги раҳбарияти билан учрашувда Россия-Украина тинчлик музокараларини бошлаш учун Киев ўз қўшинларини ДХР, ЛХР, Херсон ва Запорожье вилоятлари ҳудудларидан олиб чиқиб кетиши кераклигини айтди. Россия етакчиси Украина томони бу шартга рози бўлгач, жанговар ҳаракатлар дарҳол тўхтатилишини таъкидлади. Бундан ташқари, Киев Шимолий Атлантика альянсига қўшилиш режаларидан воз кечганини расман эълон қилиши керак.
