«Наврўз» ашула ва рақс ансамбли Италияда ўтказилган халқаро фестивалнинг Гран-присини қўлга киритди
Ўзбекистон Давлат филармониясининг «Наврўз» ашула ва рақс ансамбли 5-12 март кунлари Агридженто шаҳрида (Сицилия, Италия) бўлиб ўтган «Internazionale Del Folklore» 65-халқаро фестивалида муваффақиятли иштирок этди. Бу ҳақда «Дунё» АА хабар берди.
Албания, Арманистон, АҚШ, Болгария, Греция, Грузия, Испания, Италия, Ҳиндистон, Кения, Корея, Қирғизистон, Кот-д’Ивуар, Македония, Малайзия, Мексика, Полша, Сербия, АҚШ, Таиланд, Шотландия, Хорватия, Чили ва Япония каби 29 давлатдан 52 жамоа иштирок этган фестивалда «Наврўз» ашула ва рақс ансамбли фестивал Гран-присини қўлга киритди.
Ғолибларга мукофотни туризм, спорт ва кўнгилочар масалалар бўйича минтақавий маслаҳатчи Эльвира Амата, Агридженто мэри Франческо Мичике ва шаҳар префекти Мария Рита Коккиуфа топширди.
Қайд этиш жоизки, фестивал ташкил этилганидан буён Марказий Осиё давлатларидан бирорта жамоа ушбу маданий тадбирда иштирок этмаган. «Наврўз» ансамблининг иштироки Ўзбекистоннинг Италиядаги элчихонаси кўмагида ташкил этилди.
Жамоамиз фестивалда Ўзбекистон маданий меросининг элементи сифатида ЮНЕСКОнинг номоддий маданий мероси рўйхатига киритилган «Лазги» рақсини ижро этди.
Ўзбекистон номидан илк бор иштирок этган бадиий раҳбар ва бош хореограф Зарина Аҳмедова бошчилигидаги «Наврўз» ашула ва рақс ансамбли халқаро фестивалда асосий ўринни эгаллагани ўзбек миллий рақс санъатининг жаҳон маданиятида юксак эътирофининг яна бир ифодаси бўлди.
Ўзбекистон делегацияси билан Италияга келган Ўзбекистон халқ артисти Гулсанам Мамазоитова ҳам ўз қўшиқларини тақдим этди. Унинг қўшиқлари хорижлик томошабинларнинг меҳрини қозонди.
Тадбир ташкилотчилари ансамблнинг мусиқа ва қўшиқлари, ажойиб рақслари, ёрқин либослари Ўзбекистон маданий қадриятлари ва бой тарихий-маданий меросининг энг ёрқин ифодаси эканини қайд этишди.
«Наврўз» ансамблининг нуфузли халқаро фестивалдаги ушбу ютуғи халқимизнинг асрлар давомида шаклланган маданиятини жаҳон миқёсида кенг тарғиб этишга қўшган улкан ҳиссаси бўлди. Ушбу ютуқнинг меҳр-оқибат, ҳамжиҳатлик, инсонпарварлик, бағрикенглик, бунёдкорлик ва саховат тимсоли бўлган «Наврўз» байрами арафасида қўлга китилгани, икки ҳисса қувонарлидир.
Италиянинг «agrigentooggi.it» ва «comunicalo.it» онлайн нашрларида «Наврўз» ашула ва рақс ансамблининг ушбу фестивалдаги муваффақиятли иштирокига бағишланган мақолалар жойлаштирилди. Ўзбекистон санъат усталарининг чиқишлари, шунингдек, Youtu.be канали орқали ҳам намойиш этилди.
