НАТО Бош котиби: Россиянинг Украина билан уруши йиллар давом этиши мумкин

НАТО Бош котиби Йенс Столтенберг Германиянинг Bild газетасига берган интервьюсида Россиянинг Украинага қарши уруши йилларга чўзилиши мумкинлигини айтди ва Украина қўшинларини замонавий қуроллар билан таъминлаш мамлакатнинг озодлик имкониятларини оширишини қўшимча қилди.

Буюк Британия Бош вазири Борис Жонсон Sunday Times саҳифаларида худди шундай баёнот билан чиқди.

"Бу йилларга чўзилиши мумкинлигига тайёр бўлишимиз керак. Биз Украинани қўллаб-қувватлашни тўхтатмаслигимиз керак", - деди Столтенберг. "Агар харажатлар катта бўлса ҳам - нафақат ҳарбий ёрдам учун, балки энергия ва озиқ-овқат нархларининг кўтарилиши туфайли ҳам", дея қўшимча қилди у (Reuters'дан иқтибос).

НАТОнинг июнь ойи охирида Мадридда бўлиб ўтадиган саммитида Украинага ёрдам пакети келишиб олиниши кутилмоқда, бу эса мамлакатга Совет давридаги эски қуроллардан НАТО стандартидаги жиҳозларга ўтишга ёрдам беради, деди Столтенберг шу ҳафта бошида.