Исроил армиясига Ғазо аҳолисини кўчириш режасини тайёрлаш топширилди

Исроил мудофаа вазири Исраэль Кац Исроил мудофаа армиясига (ЦАҲАЛ) Ғазо сектори аҳолисига «ихтиёрий равишда анклавни тарк этиш» ва уларни қабул қилишга рози бўлган исталган жойга кетиш имконини берувчи режа тайёрлашни буюрди, деб ёзади The Times of Israel вазир идораси баёнотига таяниб.

Режада қуруқликдаги ўтиш жойлари орқали чиқиш, шунингдек, денгиз ва ҳаво йўллари орқали чиқиш учун «махсус келишувлар» кўзда тутилади. «Ғазо аҳолисига бутун дунёда бўлгани каби чиқиш ва иммиграция эркинлиги берилиши керак», — дея вазирнинг сўзларини келтиради нашр.

Кац бу ҳақда кеча АҚШ президенти Дональд Трамп Вашингтонда Исроил бош вазири Биньямин Нетаньяҳу билан қўшма матбуот анжуманида АҚШ Ғазо секторини «ўз назорати остига олишини» айтганидан сўнг маълум қилди. Унинг қайд этишича, фаластинликлар Ғазога қайтмаслиги керак, чунки бу ҳудуд «улар учун жуда ноқулай». Ғазо ўрнига, унинг сўзларига кўра, фаластинликларга яшаш учун «яхши, янги, чиройли ер майдони» бериш керак.

Трампнинг сўзлари араб давлатлари ва АҚШнинг бошқа иттифоқчиларининг норозилигига сабаб бўлди, деб ёзади Washington Post. Саудия Арабистони қироллик «пойтахти Шарқий Қуддус бўлган мустақил Фаластин давлатини барпо этиш бўйича тинимсиз саъй-ҳаракатларни давом эттириши ва бусиз Исроил билан дипломатик алоқалар ўрнатмаслиги» ҳақида баёнот эълон қилди.

БМТ бош котиби Антониу Гутерриш, ўз навбатида, Ғазода «этник тозалашнинг ҳар қандай шаклига» қарши чиқди, бироқ Трампнинг таклифини тилга олмади. «Ечим излашда муаммони чигаллаштирмаслигимиз керак», — деди у.

Оқ уй Трамп баёнотининг баъзи қисмларини юмшатишга ҳаракат қилди. Оқ уй матбуот котиби Каролин Ливитт журналистларга Трампнинг таклифига кўра, фаластинликлар Трамп айтганидек, бутунлай эмас, балки вақтинча кўчирилишини айтди. Унинг қўшимча қилишича, Трампнинг режаси «АҚШ ҳарбийларининг Ғазо секторида бўлишини англатмайди». Трамп эса бир кун аввал Ғазода хавфсизликни таъминлашга ёрдам бериш учун АҚШ қўшинларини юборишини истисно қилмаганди.