Исроил агрессияси иқтисодиётга зарба беради
Халқаро рейтинг агентлиги Fitch Ratings Исроилнинг хорижий валютадаги узоқ муддатли дефолт рейтингини А+ дан А га туширди. Рейтингнинг пасайиши «Ғазодаги урушнинг давом этиши, ортиб бораётган геосиёсий хавфлар ва кўплаб жабҳаларда ҳарбий амалиётлар таъсирини» акс эттиргани айтилади.
«Инсон харажатларидан ташқари, бу [Ғазо уруши] сезиларли қўшимча ҳарбий харажатларга, инфратузилманинг вайрон бўлишига ва иқтисодий фаолият ва инвестициялар учун узоқ давом этадиган зарарга олиб келиши мумкин, бу эса Исроилнинг кредит профилининг янада ёмонлашишига олиб келиши мумкин», дейилади Fitch Ratings ҳисоботида.
Исроил иқтисодиёти учун прогноз ҳам салбий бўлиб қолмоқда. Исроилнинг буджет тақчиллиги 2023 йилдаги ялпи ички маҳсулотнинг 4,1 фоизидан 2024 йил охирига келиб 7,8 фоизга ошади.
«Давлат молияси зарар кўрди ва биз 2024 йилда ялпи ички маҳсулотнинг 7,8 фоизини ташкил этадиган буджет тақчиллигини прогноз қилмоқдамиз, қарз эса ўрта муддатли истиқболда ЯИМнинг 70 фоизидан юқори бўлади. Бундан ташқари, Жаҳон банкининг бошқарув кўрсаткичлари ёмонлашиши мумкин, бу эса Исроилнинг кредит қобилиятига таъсир қилади», — дейилади агентлик баёнотида.
Фитч прогнозларига кўра, қарзнинг ЯИМга нисбати 2025 йилда 72 фоизга кўтарилади, бу 2020 йилда коронавирус пандемияси даврида қайд этилган 71 фоиздан юқори.
Fitch Ratings Исроилнинг Ғазо секторига ҳужумлари бошланганидан бери Исроилнинг кредит рейтингини пасайтирган учта рейтинг агентлигининг охиргиси ҳисобланади. Шундай қилиб, Moody’s мамлакатнинг кредит рейтингини А1 дан А2 га, Standard & Poor's эса АА- дан А+ га туширди.
