Европада яна бир давлат эвтаназияни қонунийлаштирди
Испания депутатлар конгресси (парламентнинг қуйи палатаси) эвтаназия (беморнинг ўз ўлимини тезлатиш ҳақидаги илтимосини қаноатлантириш)ни қонунийлаштирди.
"Reuters" ахборот агентлигининг хабарига кўра, мамлакатда эвтаназия тартибини тартибга солувчи қонун лойиҳасини ниҳоят маъқулланган. Ушбу ташаббусни 350 депутатдан 202 нафари қўллаб-қувватлаган. Ҳужжат ой ичида кучга кириши кутилмоқда.
"Бугун муҳим кун: биз инсон ҳуқуқларининг тўлиқ тан олинишига яқинлашмоқдамиз. Биз янада инсонпарвар ва адолатли жамият сари боряпмиз", дейди ушбу ҳолатга изоҳ берган Испания соғлиқни сақлаш вазири Каролина Дариас.
Қонун ўта хавфли касалларга ёки оғир сурункали касалликларга чалинган, чидаб бўлмас жисмоний ёки руҳий азоб-уқубатларга олиб келадиган ва даволаниб бўлмайдиган кишиларга эвтаназия ҳуқуқини тартибга солиш учун ишлаб чиқилган.
Лойиҳага кўра, мамлакатнинг вояга этган фуқароси (ёки яшаш учун рухсатномаси бўлган шахслар) эвтаназия сўраши мумкин. У ўз хоҳишини камида тўрт марта тасдиқлаши керак. Ушбу қарорни фақат беморнинг ўзи қабул қилиши лозим. Сўров шифокорлар ва махсус қўмита аъзолари томонидан кўриб чиқилади.
Шундай қилиб, Испания эвтаназияни қонунийлаштирган Европанинг тўртинчи давлатига айланади. Бунгача Бельгия, Люксембург ва Нидерландия шундай қарорга келган эди.
