Дунёдаги энг кекса актёр Норман Ллойд вафот этди

Дунёдаги энг кекса актёр Норман Ллойд вафот этди

Америкалик режиссёр, актёр ва продюсер Норман Ллойд 106 ёшида вафот этди. Ллойд фаолиятини давом эттираётган дунёдаги энг кекса актёр саналган.

Variety нашрига кўра, актёр 11 май куни Лос-Анжелесдаги уйида ҳаётдан кўз юмган.

Ллойднинг дўсти, продюсер Дин Харгроувнинг таъкидлашича, марҳум актёр ҳаётининг сўнгги лаҳзаларигача турли танловлар ҳакамлар ҳайъатида, фестивал ва шоуларда иштирок этиб келган. Унинг айтишича, Ллойднинг жиддий касалликларга чалинмай узоқ умр кўриши сири «ёқимсиз одамлардан нарироқ юришидан» иборат бўлган.

Актёр 1914 йил ноябрда АҚШнинг Нью-Жерси штатида дунёга келган. У актёрлик фаолиятини 18 ёшида бошлаган. 1932 йилдан бошлаб фильмларда суратга тушган. У Альфред Хичкокнинг «Диверсант» фильмидаги (1942 йил) ролидан кейин танилган.

Бироқ актёрга ҳақиқий машҳурлик 1980-йилларда, NBC телеканалида эфирга узатилган «Сент-Элсвер» драмасидаги шифокор ролидан кейин келган. Ллойднинг актёрлик фаолияти 80 йилдан кўпроқ давом этган.

oldest.org сайти маълумотларига кўра, Ллойд 2021 йилда дунёдаги энг кекса актёрга айланганди. Кекса актёр ва актрисалар рўйхатида ундан кейинги ўринларни 99 ёшли Бетти Уайт ва 98 ёшли Жоан Коуплэнд эгаллаган.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!