Жондор туманида яшовчи М. С. жабрланувчи учун сир сақланиши лозим бўлган маълумотларни ошкор қилиш билан қўрқитиб, ўзгадан мулкни ёки мулкий ҳуқуқни топширишни, мулкий манфаатлар беришни ёхуд мулкий йўсиндаги ҳаракатлар содир этишни талаб қилиш ёхуд жабрланувчини ўз мулки ёки мулкка бўлган ҳуқуқини беришга мажбур қиладиган шароитга солиб қўйиб, товламачилик жиноятини содир қилган.

2020 йил 15 январь куни тахминан соат 11:30 ларда Жондор туман «Алели» маҳалла фуқаролар йиғини «Алели» қишлоғида яшовчи фуқаро С. Я. ўз бошқарувида бўлган “Ласетти” русумли 80 X 591 LA давлат рақамли автомашинасида туман маркази ҳудудида А. исмли аёлни автомашинасига миндирган. Сўнг Жондор туман «Ойтўғди» маҳалла фуқаролар йиғини «Ойтўғди» қишлоғи чеккасига бориб, машинасини тўхтатган. У машинасининг орқа ўриндиғида А. билан гаплашиб турганида, Жондор туман «Ойтўғди» маҳалла фуқаролар йиғини «Ойтўғди» қишлоғида яшовчи фуқаро М. С. ўзига тегишли бўлган “SAMSUNG” русумли уяли қўл телефонига уларни видеотасвирга олиб, С. Я.га унинг ишқий муносабатларини қўл телефони ёрдамида видеотасвирга олганлигини айтади. Сўнг фуқаролик паспортини олиб қўйиб, товламачилик йўли билан ушбу видеотасвирни ҳуқуқни муҳофаза қилувчи органларга тақдим этиш билан қўрқитиб, ундан 300.000 сўм пул талаб қилади.

Ўзбекистон Республикаси Бош прокуратураси ҳузуридаги Департаментнинг Жондор туман бўлими ходимлари томонидан 2020 йил 15 январь куни тахминан соат 18:10ларда ўтказилган тезкор тадбир давомида Жондор туман «Ойтўғди» маҳалла фуқаролар йиғини «Ойтўғди» қишлоғи ҳудудида М. С. фуқаро С. Я. дан кимёвий ишлов берилган 200.000 сўм пулларни олиб, унинг фуқаролик паспортини қайтариб берган вақтда ушланиб, тегишли тартибда расмийлаштирилган.

Мазкур жиноят иши юзасидан М. С. Жиноят ишлари бўйича Жондор туман суди томонидан Ўзбекистон Республикаси Жиноят кодекси 165-моддаси 1-қисмида назарда тутилган жиноятни содир этганликда айбдор деб топилиб, унга нисбатан шу модда билан ЖКнинг 57-моддасини қўллаб, 1 (бир) йил озодликни чеклаш жазоси тайинлаган.

Бахрилло ЖАББОРОВ, 

Жиноят ишлари бўйича Жондор туман суди раиси