Британиялик олимлар смартфон орқали инфекция юқтириш хавфи ҳақида огоҳлантирди
Смартфон юзасида жуда кўп хавфли микроблар бўлиши мумкин, дейилади Британиядаги Суррея университети олимларининг олиб борган тадқиқотлари натижасида эълон қилинган ҳисоботда.
Олимлар эксперимент давомида оддий одамлар тутадиган гажетларнинг юзасини артиб текширганда смартфонлар хавфли бактерияларнинг макони эканини аниқлашган.
Тадқиқот доирасида оддий одамлар тутаётган 30 та телефон текшириб кўрилган. Маълум бўлишича, айрим смартфонлар корпусида унитаз атрофидагидан 18 баробар кўп бактерия бўлиши мумкин экан.
Олимларнинг аниқлашича, бактериялар қатор оғир касалликлар келиб чиқашига сабаб бўлади. Масалан, тери ва ичак инфекцияси, пневмония ва менингит кабилар. Шу сабабли инфекционистлар смартфоннинг устки қисмини ҳар куни бир марта тозалашни маслаҳат бермоқда.
Бунинг учун бактерияларга қарши ишлатиладиган салфеткалар, қўлга ишлатиладиган микробларга қарши воситалар, спирт ёки қурулмаларни дезинфекция қилиш учун мўлжалланган махсус воситалар қўл келади, дейди олимлар.
Таъкидланишича, смартфонни артиш олдидан уни тармоқдан ўчириш лозим. Муҳими тозаловчи воситалар корпус ичига тушмасин.
