Боррелл: Россия қандай ўзгарганини кўрмадик
Европа дипломатияси раҳбари Жосеп Боррел Оксфорд университетида сўзлаган нутқида Россиянинг Владимир Путин бошчилигидаги сиёсатини кескин танқид қилди. Унинг нутқи Европа Иттифоқи Ташқи ишлар хизмати сайтида келтирилган.
«Путин раҳбарлигида Россия дунёга империалистик қарашга қайтди. Подшоҳлар ва Совет империяси давридаги император Россияси ўзининг аввалги буюклиги ва таъсирига қайтишни орзу қилган Путин томонидан қайта тикланди», — деди Боррел.
У 2008 йилда Россиянинг Грузиядаги агрессияси ва 2014 йилда Қримнинг аннекция қилинишини эслади. «Биз Россия Путин бошчилигида қандай ўзгариб бораётганини кўрмаганмиз ёки кўришни истамаганмиз. 2007 йилда Мюнхен конференциясида Путиннинг ўзи бизни огоҳлантирган бўлса ҳам», — деди Европа дипломатияси раҳбари.
“Бугун Путин барчамиз учун экзистенциал таҳдид солмоқда. Агар у Украинада муваффақият қозонса, тўхтамайди», - дея огоҳлантирди Боррел. У Путин Киевда қўғирчоқ ҳукумат ўрнатиши, Полша билан чегарада қўшинлар жойлаштириши ва жаҳон ғалла бозорининг 44 фоизи устидан назорат ўрнатиши мумкинлигини айтди.
